Վրաստանի փոխվարչապետ, արտաքին գործերի նախարար Դավիդ Զալկալիանին ամերիկյան կողմի նախաձեռնությամբ հեռախոսազրույց է ունեցել ԱՄՆ-ի պետքարտուղարի տեղակալ Վենդի Շերմանի հետ։ Այս մասին տեղեկություն է տարածում Վրաստանի արտաքին գործերի նախարարությունը։

Նրանց խոսքով՝ կողմերը քննարկել են տարածաշրջանում անվտանգության միջավայրը, Ուկրաինայի շուրջ վերջին զարգացումները և Վրաստանի և Ուկրաինայի եվրատլանտյան ինտեգրումը հետաձգելու Ռուսաստանի Դաշնության ջանքերը։

«Դավիդ Զալկալիանին շնորհակալություն է հայտնել Վենդի Շերմանին հաջորդ շաբաթ ԱՄՆ-Ռուսաստան երկկողմ երկխոսության, ինչպես նաև ՆԱՏՕ-Ռուսաստան խորհրդի և ԵԱՀԿ-ի շրջանակներում հանդիպումներին ընդառաջ համակարգման և տեղեկատվության փոխանակման համար՝ վերահաստատելով ԱՄՆ-Վրաստան ռազմավարական գործընկերության ուժն ու կարևորությունը:

Խոսելով պետքարտուղարի տեղակալի հետ՝ Վրաստանի ԱԳ նախարարը նշել է, որ Վրաստանի և Ուկրաինայի ՆԱՏՕ-ին ինտեգրմանը խոչընդոտելու Ռուսաստանի ջանքերը հակասում են միջազգային իրավունքի սկզբունքներին ու նորմերին և նմանատիպ հռետորաբանությանը, որը նպատակաուղղված է սահմանափակելու ինքնիշխան պետության իրավունքը՝ հետապնդելու լիարժեք անկախ արտաքին և անվտանգության քաղաքականություն անընդունելի է։ Ռուսաստանի Դաշնության կողմից հարևան երկրների տարածքների օկուպացիան և միջազգային պարտավորությունների չկատարումը, ներառյալ 2008 թվականի օգոստոսի 12-ի հրադադարի համաձայնագիրը, շարունակում են մնալ ժամանակակից եվրոպական անվտանգության հիմնական մարտահրավերներից մեկը», – ասվում է Վրաստանի ԱԳ նախարարության կողմից տրամադրված տեղեկատվության մեջ։

Ըստ նրանց՝ արտգործնախարարը երախտագիտություն է հայտնել ԱՄՆ-ին՝ Վրաստանի ինքնիշխանությանն ու տարածքային ամբողջականությանը, ինչպես նաև եվրոպական և եվրատլանտյան ինտեգրմանը ցուցաբերած անսասան աջակցության համար։ Բանակցությունների ընթացքում կողմերը կենտրոնացել են ԱՄՆ-Վրաստան ռազմավարական գործընկերության խորացման վրա և պայմանավորվել են ապագայում շարունակել խորհրդակցությունները տարածաշրջանային անվտանգության հարցերի շուրջ։