Վրաստանի դատախազությունը մեկ անձի մեղադրանք է առաջադրել՝ խարդախությամբ առանձնապես խոշոր չափի գումար ձեռք բերելու փաստով։

Քննչական գերատեսչության տվյալներով՝ ՆԳՆ-ի կողմից իրականացված քննությամբ պարզվել է, որ մեղադրյալը տուժողներին ապօրինի կերպով գումար յուրացնելու նպատակով համոզել է, որ որպես Թբիլիսիի տեխնիկական համալսարանի դեկան՝ 3000-5000 լարի վճարելու դիմաց. նա կարող էր ուսանողներին ընդունել նույն համալսարանում՝ առանց միասնական ազգային քննություններ հանձնելու։ Նաև մեղադրյալն օգտվել է տուժողների վստահությունից, խաբել նրանց, թե իբր գործող ուսանողական ծրագրի շրջանակներում 7000-11000 լարի նվազագույն գնով կարող է բնակարաններ փոխանցել Թբիլիսիի ուսանողներին։

«Մեղադրյալը նշված սխեմայով խաբեություն է կատարել 10 տուժողի՝ ընդհանուր 119030 լարի։

Իրավապահները մեղադրյալին ձերբակալել են 2023 թվականի հունվարի 21-ին՝ Թբիլիսիի քաղաքային դատարանի որոշման հիման վրա։ Նրան մեղադրանք է առաջադրվել Քրեական օրենսգրքի 180-րդ հոդվածի 2-րդ մասի «բ» և 3-րդ մասի «բ» ենթակետով (խարդախություն, այն է` խարդախությամբ ուրիշի գույքը ապօրինի յուրացնելու նպատակով, որը պատճառել է զգալի վնաս և խոշոր չափով՝ 10 դրվագ), որը պատժի չափով նախատեսում է ազատազրկում՝ վեցից ինը տարի ժամկետով։

Դատախազությունն արդեն դիմել է Թբիլիսիի քաղաքային դատարան՝ մեղադրյալի նկատմամբ որպես խափանման միջոց կալանավորումը կիրառելու միջնորդությամբ։

Քրեական գործի նախաքննությունը շարունակվում է։ Վրաստանի դատախազությունը կոչ է անում քաղաքացիներին իրենց նկատմամբ նմանատիպ գործողությունների դեպքում անհապաղ դիմել իրավապահ մարմիններին»,- ասված է դատախազության տեղեկատվության մեջ։