Վրաստանի դատախազությունը համաձայն չէ Թբիլիսիի քաղաքային դատարանի կայացրած վճռի հետ, որով մեղադրյալը մասնակիորեն արդարացվել է սեռական բնույթի այլ արարքների համար, և որոշումը բողոքարկելու է Վերաքննիչ դատարան։ Այս մասին նշված է Գլխավոր դատախազության տեղեկատվության մեջ։

«Ներքին գործերի նախարարության կողմից իրականացված հետաքննությամբ պարզվել է, որ 2021 թվականի մարտի 16-ին Գ.Ծ.-ն խնդրել է Ա.Դ.-ին ուղեկցել իրեն Թբիլիսիում նախատեսված հանդիպմանը՝ իր քաղաքական գործունեության հիման վրա բանակցություններում օգնելու նպատակով։ Թբիլիսի ժամանելուց հետո Գ.Ծ.-ն տուժողին առաջարկել է գիշերել վարձակալած բնակարանում, որտեղ ալկոհոլի ազդեցության տակ գտնվող Գ.Ծ.-ն տուժողի նկատմամբ իրականացրել է բռնի սեռական բնույթի գործողություններ: Նշված բռնության հետևանքով տուժողը մարմնի տարբեր մասերում վնասվածքներ է ստացել։

Գ.Ծ.-ին մեղադրանք է առաջադրվել Վրաստանի քրեական օրենսգրքի 138-րդ հոդվածի առաջին մասով (բռնությամբ կատարված սեռական այլ գործողություններ):

Թբիլիսիի քաղաքային դատարանի դատավճռով մեղադրյալն արդարացվել է Քրեական օրենսգրքի 138-րդ հոդվածի առաջին մասով առաջադրված մեղադրանքից, մեղավոր է ճանաչվել 126-րդ հոդվածի առաջին մասով (տուժողին ֆիզիկական ցավ պատճառել) և դատապարտվել է վեց ամսվա ազատազրկման։

Մեղադրող կողմը համաձայն չէ Թբիլիսիի քաղաքային դատարանի որոշման հետ և օրենքով սահմանված ժամկետում կբողոքարկի վճիռը Վերաքննիչ դատարանում»,- նշված է դատախազության հաղորդագրության մեջ։