Վրաստանի դատախազությունը բացահայտել է սոցիալական ցանցերի և կապի տարբեր միջոցների միջոցով կատարված խարդախության սխեման և քրեական հետապնդում է սկսել մեկ անձի նկատմամբ,- հայտնում է Վրաստանի դատախազությունը։

Քննչական գերատեսչության տվյալներով՝ գործի քննությամբ պարզվել է, որ մեղադրյալը սոցիալական ցանցերի և հաղորդակցության տարբեր միջոցներով կապ է հաստատել Վրաստանի քաղաքացիների հետ, որոնց ծանոթացել է մտացածին անուններով, վստահության մեջ է մտել և իբր ԱՄՆ մեկնելու, ինչպես նաև Էստոնիայի և Լիտվայի Հանրապետությունների աշխատանքային վիզաներ ստանալու հարցում օգնության համար խոշոր չափի գումար է պահանջել:

«Զուգահեռ ռեժիմով մեղադրյալը Վրաստանում որոնել է կրիպտոարժույթի առևտրականներին, որոնց հետ կապվել է «Facebook»-ի կեղծ պրոֆիլների միջոցով և համաձայնվել է կրիպտոարժույթ գնել։

Ամբաստանյալը, իբր մատուցվելիք ծառայության դիմաց տուժածներին ստիպել է մեծ քանակությամբ դրամական միջոցներ փոխանցել իր կողմից նախապես որոնված կրիպտոարժույթ վաճառող անձանց պատկանող բանկային հաշիվներին։ Փոխարենը պահանջել է ավանդադրված գումարին համապատասխան կրիպտոարժույթ, որը փոխանցել է իր վերահսկողության տակ գտնվող կրիպտո դրամապանակներին և ապօրինի յուրացրել։ Այդ կերպ մեղադրյալը խաբեությամբ տիրացել է տուժողներին պատկանող տասնյակ հազարավոր լարիներին։

Հետաքննությունը դատարանի որոշման հիման վրա առգրավել է մեղադրյալի անունով վիրտուալ ակտիվների ծառայություններ մատուցողների հարթակներում բացված դրամապանակները և դրանց վրա տեղադրված կրիպտոարժույթը։

Մեղադրյալի նկատմամբ քրեական հետապնդում է սկսվել ապօրինի յուրացման նպատակով ուրիշի առանձնապես խոշոր չափերի խարդախությամբ գույք ձեռք բերելու փաստով։ Մեղադրյալի նկատմամբ որպես խափանման միջոց է կիրառվել հեռակա կալանավորումը»,- նշվում է տեղեկատվության մեջ։