Թբիլիսիի քաղաքային դատարանը «սաբոտաժի գործով» Զուրաբ «Գիրչի» Ջափարիձեին նշանակել է 30 000 լարիի չկալանավորող գրավ։ Բացի այդ, նրան ժամանակավորապես առգրավվել են անձնագիրն ու նույնականացման վկայականը։

Այսօրվա դատական նիստին ներկա է եղել նաև հենց Զուրաբ Ջափարիձեն։ Դատական նիստից հետո նա նշել է, որ դեռ չի որոշել՝ վճարելու է արդյոք գրավը։

«Դեռ չունեմ դիրքորոշում։ Իմ կարծիքով, այս որոշումը միակ պատճառը իմ այսօրվա բրիֆինգն էր, որտեղ խոսեցինք նախորդ տարվա նոյեմբեր-դեկտեմբերին մարդկանց նկատմամբ իրականացված համակարգային խոշտանգումների և քիմիական նյութերի կիրառման մասին։ Միայն այդ բանի հետ եմ կապում այս ամենը, այլ բացատրություն չունեմ՝ ինչու այս ամենը տեղի ունեցավ այսօր, և ինչու ոչ՝ դեռ անցած ուրբաթ օրը», – ասել է Ջափարիձեն։

Հիշեցնենք, որ Վրաստանի գլխավոր դատախազությունը 2025 թվականի նոյեմբերի 6-ին սկսել էր քրեական հետապնդում մի շարք ընդդիմադիր գործիչների նկատմամբ՝ այդ թվում Միխեիլ Սաակաշվիլիի, Գիորգի Վաշաձեի, Նիկա Գվարամիայի, Նիկանոր Մելիայի, Զուրաբ Ջափարիձեի, Էլենե Խոշտարիայի, Մամուկա Խազարաձեի և Բադրի Ջափարիձեի։

Գլխավոր դատախազության հաղորդագրության համաձայն՝ գործը վերաբերում է պետության դեմ ուղղված հանցագործություններին՝ սաբոտաժին, օտար երկրի թշնամական գործունեությանը նպաստելուն, Վրաստանի սահմանադրական կարգի և ազգային անվտանգության դեմ գործողությունների ֆինանսավորմանը, ինչպես նաև՝ սահմանադրական կարգը բռնությամբ փոխելու կամ իշխանությունը տապալելու հրապարակային կոչերին։