Թբիլիսիի քաղաքային դատարանը կալանքի տակ է թողել ութ անձի, ովքեր մեղադրվում են խմբակային բռնություն կազմակերպելու, ղեկավարելու և մասնակցելու համար։ Կալանավորվածներն են՝ Զվիադ Ցեցխլաձե, Վասիլ Կաձելաշվիլի, Վեփխիա Կասրաձե, Իրակլի Միմինոշվիլի, Ինսաֆ Ալիև, Թորնիկե Գոշաձե, Նիկոլոզ Ջավախիշվիլի և Գիորգի Գիորգաձե։

Այսօրվա նիստում քննարկվել է խափանման միջոցի փոփոխման հարցը։

Միևնույն ժամանակ, այսօրվա դատական նիստի ընթացքում ամբաստանյալները խոսքի իրավունք են ստացել։ Նրանց խոսքով՝ գործում չկան ապացույցներ, որոնք հաստատում են իրենց ներկայացված մեղադրանքը։

Ինչպես նշել է դատախազ Վաժա Թոդուան, այսօրվա նիստում պաշտպանական կողմը չի ներկայացրել որևէ նոր հանգամանք, որը կարող էր ազդել ամբաստանյալների նկատմամբ կիրառված խափանման միջոցի վրա։

«Երբ դատարանը մի քանի անգամ արդեն քննարկել է այս հարցը, նշել է, որ ոչ մի նոր էական հանգամանք չի ներկայացվել որևէ կողմից, և ամբաստանյալների նկատմամբ կիրառված կալանքը թողնվել է ուժի մեջ։ Նույնը վերաբերում է նաև այսօրվա նիստին՝ պաշտպանական կողմը կրկին չի ներկայացրել որևէ նոր հանգամանք, որը կազդեր խափանման միջոցի փոփոխման վրա», – հայտարարել է դատախազը։

Նիստի ընթացքում ամբաստանյալներից մեկը՝ Վեփխիա Կասրաձեն, հայտարարել է. «Այսօր ինչ կատարվում է դահլիճում՝ դա չարիք է»։ Նա նաև դիմել է պատրիարքին։

«Ցանկանում եմ դիմել իմ պատրիարքին։ Շատ մեծ խնդրանք ունեմ՝ ուղարկեք ձեր ներկայացուցիչներին, թող ներկա գտնվեն մեր դատերին։ Որտեղ պետք է թաքնվեմ, ումից պետք է փախչեմ։ Ես ունեի այդ հնարավորությունը, բայց չօգտվեցի դրանից։ Ինչի՞ց պիտի փախչեի։ Երբ արդար եմ, ինչու՞ պիտի թաքնվեմ։ Դա էլ է բավական, որ անմեղ եմ և պատժվում եմ», – հայտարարել է Վեփխիա Կասրաձեն։

Գործով ութ ամբաստանյալներին մեղադրում են խմբակային բռնությանը մասնակցելու մեջ։ Դատարանի բակում հավաքվել էին նրանց աջակիցները՝ համերաշխություն հայտնելու նպատակով։