Բաթումիի քաղաքային դատարանը նախորդ տարվա հոկտեմբերի 8-ին Բաթումում Մայիսի 26 փողոցում բնակելի շենքի փլուզման գործով ձերբակալված երեք անձի դատապարտել է ազատազրկման։

Բնակարանի սեփականատեր Զաուր Բուդագովը դատապարտվել է մեկ տարոի, իսկ հայրն ու որդին՝ Հուսեյն ու Գիորգի Սուրմանիձեները երեք տարի ազատազրկման։

«Մուտքը փլուզվել է ապօրինի շինության պատճառով։ Բլոկի վրա կտեսնեիք ներկառուցված պատշգամբներ, ձևափոխված բնակարաններ, օրինակ՝ մեկ ննջասենյակը վերածված երկու ննջասենյակի և այլն։ Մենք համաձայն չենք փորձագիտական ​​եզրակացության հետ։ Մենք անպայման բողոքարկելու ենք իմ պաշտպանյալի նկատմամբ կայացված դատավճիռը»,- ասել է բնակարանի սեփականատիրոջ փաստաբան Ռամին Պապիձեն։

2021 թվականի հոկտեմբերի 8-ին՝ ժամը 12:00-ի սահմաններում, Բաթումիի Մայիսի 26 փողոցի բնակելի շենքի մի հատվածը փլուզվել է։ Զոհվել է ինը մարդ, վիրավորվել է մեկ մարդ։ Ներքին գործերի նախարարությունը շենքի փլուզման փաստի առթիվ ընթացող հետաքննության շրջանակներում ձերբակալել է երեք անձի։ Դատախազությունը նրանց մեղադրանք է առաջադրել շինարարական աշխատանքների ընթացքում անվտանգության կանոնները խախտելու համար, ինչը հանգեցրել է մարդկանց մահվան և ծանր հետևանքների։ Փորձագիտական ​​եզրակացության համաձայն՝ տան փլուզումը տեղի է ունեցել բնակարանի վերակառուցման ժամանակ հենապատերի փոխարինման հետևանքով։