Մցխեթայի շրջանային դատարանն ամբողջությամբ ընդունել է դատախազության ներկայացրած ապացույցները և մեղավոր է ճանաչել ամբաստանյալին՝ Միրիան Կուկավայի դիտավորյալ սպանության մեջ։ Դատարանը վերոհիշյալ քրեական գործով երկու անձի մեղավոր է ճանաչել նաև խմբի կողմից կատարված խուլիգանության համար։ Տեղեկությունը տարածում է Վրաստանի դատախազությունը։

Քննչական գերատեսչության տվյալներով՝ դատախազության ներկայացրած ապացույցներով հաստատվել է, որ 2022 թվականի հուլիսի 28-ին Մցխեթայի շրջանի Ցխվարիճամիա գյուղում ծննդյան խնջույքի հյուրերից մի քանիսի միջև առերեսման ժամանակ ամբաստանյալներից մեկը դանակահարել է Միրիան Կուկավային, ով մինչ հիվանդանոց տեղափոխվելը մահացել է։ Հետաքննությունը նաև բացահայտել է Միրիան Կուկավայի դիտավորյալ սպանությունից առաջ տեղի ունեցած առերեսմանը մասնակցող այլ անձանց, ովքեր բանավոր և ֆիզիկական բռնության են ենթարկել Միրիան Կուկավային և նրա ընկերներին։

«Դիտավորյալ սպանության մեջ մեղադրվող անձին մեղադրանք է առաջադրվել Վրաստանի քրեական օրենսգրքի 108-րդ հոդվածի (դիտավորյալ սպանություն), 239-րդ հոդվածի 2-րդ մասի «ա» ենթակետով և նույն հոդվածի երրորդ մասով (խուլիգանություն, որը կատարվել է մի խումբ անձանց կողմից), և երկու անձի մեղադրանք է առաջադրվել Վրաստանի քրեական օրենսգրքի 239-րդ հոդվածի 2-րդ մասի «ա» ենթակետով (խուլիգանություն, որը կատարվել է խմբի կողմից նախնական համաձայնությամբ):

Մցխեթայի շրջանային դատարանը բոլոր երեք անձանց մեղավոր է ճանաչել առաջադրված մեղադրանքներում և դիտավորյալ սպանության մեջ մեղադրվողին դատապարտել է 14 տարվա, իսկ խուլիգանության մեջ մեղադրվողներին՝ 3 տարի 6 ամիս և 2 տարի ժամկետով ազատազրկման։

Այստեղ հանրությանը հիշեցնում ենք, որ նշված քրեական գործով խուլիգանություն կատարելու, կեղծ տեղեկատվություն տրամադրելու և հանցագործության մասին չհայտնելու մեջ մեղադրվող այլ անձանց գործը շարունակում է քննվել դատարանում»,- նշված է դատախազության հաղորդագրության մեջ։