Չինաստանի պաշտպանության նախարար Լի Շանֆուն հայտարարել է, որ չինացի զինվորականները չեն վարանի գործելու, եթե որևէ մեկը համարձակվի առանձնացնել Թայվանը Չինաստանից։

Չինաստանի պաշտպանության նախարարության ղեկավարի խոսքով՝ «Մեկ Չինաստան» սկզբունքը դարձել է միջազգային հարաբերություններում համընդհանուր ճանաչված հիմնական նորմ, և դրա խախտման ցանկացած գործողություն ծիծաղելի է և վտանգավոր։

Չինաստանի պաշտպանության նախարարի խոսքով՝ երկիրը վերամիավորվելու է, քանի որ այն ներկայացնում է ժողովրդի կամքը և աշխարհի ընդհանուր միտումը։

Լի Շանֆուն մեղադրել է ԱՄՆ-ին և նրա դաշնակիցներին հնդկախաղաղօվկիանոսյան տարածաշրջանն ապակայունացնելու փորձերի մեջ։ Չինաստանի պաշտպանության նախարարության ղեկավարը նաև նշել է, որ ԱՄՆ-ի և Չինաստանի միջև ցանկացած «կատաղի առճակատում» «անտանելի աղետ կլինի աշխարհի համար»։

«Մենք պատրաստ ենք մեծագույն անկեղծությամբ և մեծ ջանքերով ձգտել խաղաղ վերամիավորման, բայց երբեք ոչ մեկին չենք խոստանա, որ կհրաժարվենք ուժի կիրառումից։ Եթե ​​որևէ մեկը համարձակվի առանձնացնել Թայվանը Չինաստանից, չինացի զինվորականները չեն վարանի գործելու։ Մենք ոչ մեկից չենք վախենում և հաստատակամորեն կպաշտպանենք ազգային ինքնիշխանությունն ու տարածքային ամբողջականությունը՝ անկախ նրանից, թե ինչ գնով լինի»,- ասել է Չինաստանի պաշտպանության նախարարը։