Չեմպիոնների լիգա | Յոթ տարվա դադարից հետո – Վրաստանի չեմպիոնը հաղթահարեց առաջին փուլը #1TVSPORT
Թբիլիսիի «Իբերիան» Չեմպիոնների լիգայի որակավորման առաջին փուլի պատասխան խաղում չկարողացավ հաղթել էստոնական «Ֆլորային» (2:2), սակայն երկու հանդիպումների ընդհանուր հաշվով (2:2, 3:2) դարձավ վրացական առաջին թիմը, որը վերջին յոթ տարում հաղթահարեց այս արգելքը։
Վրաստանի չեմպիոնը Տալլինում կայացած առաջին խաղում հաղթել էր 3:2 հաշվով և համարվում էր զույգի ֆավորիտը։ Այնուամենայնիվ, պատասխան հանդիպումից առաջ Անդրեյ Դեմչենկոյի թիմը կորցրեց կարևոր խաղացողի՝ 17-ամյա տաղանդավոր Անդրիա Բարտիշվիլիին, իսկ պատճառը մարզման ժամանակ ստացած վնասվածքն էր. Անդրիան վնասել էր կոճը։
«Իբերիան» հիանալի սկսեց և հենց առաջին խաղակեսում կարողացավ երկու գոլ խփել։ 13-րդ րոպեին հաշիվը գլխի հարվածով բացեց Նիկա Սիխարուլաշվիլին։ Իսկ 36-րդ րոպեին նա դուբլ ձևակերպեց և թբիլիսցիների առավելությունը հասցրեց երկու գնդակի։
Երկրորդ խաղակեսում «Իբերիան» խփեց նաև երրորդ գոլը։ 47-րդ րոպեին Նաճղեբիան հակագրոհը եզրափակեց շատ գեղեցիկ հարվածով, սակայն մրցավարը արձանագրեց խաղից դուրս վիճակ։
Դրանից հետո «Իբերիան» երկու գոլ բաց թողեց։ Էստոնացիները 69-րդ րոպեին Տոնի Վարյունդի գոլի շնորհիվ նվազագույնի հասցրին հաշվի տարբերությունը։ Իսկ 84-րդ րոպեին մրցավարը 11-մետրանոց նշանակեց մեր դարպասին, որն իրացրեց Ռաինո Սապինենը՝ 2:2։
Թբիլիսիի «Իբերիա 1999»-ը Չեմպիոնների լիգայի որակավորման երկրորդ փուլում կհանդիպի Բրատիսլավայի «Սլովանին», և հաղթանակի դեպքում թիմն ավտոմատ կերպով կանցնի Եվրոպա լիգայի փլեյ-օֆֆ ու ավտոմատ կերպով կապահովի իր տեղը Կոնֆերենցիաների լիգայի խմբային փուլում։ Վրաստանի չեմպիոնը պարտության դեպքում նույնպես կշարունակի պայքարը եվրոգավաթներում՝ Կոնֆերենցիաների լիգայի փլեյ-օֆֆում։