Բժշկական և դեղագործական գործունեության կարգավորման գործակալությունը շուկայից պահանջել է Schering-Plough Labo N.V. դեղագործական ընկերության արտադրած «Դիպրոսպան» (5մգ + 2մգ)/1մլ դեղամիջոցը։

Ինչպես պարզաբանում է գործակալությունը, որոշման պատճառ է դարձել Բելգիայի դեղերի և առողջապահական ապրանքների դաշնային գործակալության որոշումը։

«Ըստ կարգավորողի՝ դեղագործական արտադրանքի որակի հետ կապված խնդիր է նկատվել չորս սերիայի վրա (W002247, W005812, W028823, W030207)՝ այն է՝ արտադրության գործընթացում չժանգոտվող պողպատի մասնիկների հնարավոր աղտոտում։ Արտադրողի կողմից տրամադրված տեղեկատվության համաձայն՝ վաճառվող արտադրանքի խմբաքանակներում պինդ մասնիկների հետ կապված անբարենպաստ ռեակցիաների մասին հաղորդումներ չեն գրանցվել»,- նշված է Բժշկական և դեղագործական գործունեությունը կարգավորող գործակալության հաղորդագրությունում։

Բժշկական և դեղագործական գործունեությունը կարգավորող գործակալության որոշմամբ՝ մինչև կասեցման պատճառի վերացումը, դեղագործական արտադրանք ներկրողներին և դիստրիբյուտորներին հանձնարարվել է դադարեցնել դեղի իրացումը, այն շուկայից հանել և ներկայացնել ձեռնարկված միջոցառումների մասին տեղեկատվություն Բժշկական և դեղագործական գործունեությունը կարգավորող գործակալությանը։