Բուլղարիայի արմատական ​​ռուսամետ կուսակցությունը ցանկանում է, որ երկիրը դուրս գա Եվրամիությունից և դառնա BRICS-ի անդամ։ Սեպտեմբերի 4-ին «Վերածնունդ» կուսակցությունը խնդրեց հանրաքվե անցկացնել՝ Եվրագոտու անդամակցությունը մինչև 2043 թվականը հետաձգելու վերաբերյալ, սակայն նրանց խնդրանքը մերժվեց սոցիալիստական, պոպուլիստական ​​և եվրոպամետ կուսակցությունների կողմից։ «Վերածնունդ» կուսակցության առաջնորդ Կոստադին Կոստադինովը հայտարարել է, որ Բուլղարիան պետք է դուրս գա ՆԱՏՕ-ից և Եվրամիությունից։

«Եթե մենք ուզում ենք ապագա ունենալ, մեր տեղը այս կեղեքիչ կառույցներում չէ։ Դրանք են Եվրամիությունն ու ՆԱՏՕ-ն։ Եթե ​​Եվրամիությունում բարեփոխումներ չկան, մենք պետք է դուրս գանք դրանից, քանի որ դրա հետ չպետք է մեռնենք»,- ասել է կուսակցության նախագահը։

Նույն կուսակցությունից մեկ այլ պատգամավոր Ցոնչո Գանևն ասում է, որ բուլղարացիներին պետք է հարցնել, թե արդյոք նրանք ցանկանում են միանալ Եվրոգոտուն։ Ըստ Գանեւի՝ «ԲՐԻԿՍ» ակումբն ավելի հարուստ է արեւմտյան երկրների համեմատ, եւ այդ պատճառով էլ հանրաքվեի անցկացումը վախ է առաջացնում եվրոպամետ կուսակցություններում։ Խորհրդարանում ունեցած ելույթի ժամանակ պատգամավորը նաև նշել է, որ բուլղար ժողովուրդը իրավասու է նման որոշումներ կայացնելու, և եվրոպամետ կուսակցությունները չպետք է կասկածի տակ դնեն դա։

«Կասկած կա, որ դուք այս հանրաքվեով փորձում եք վնասել Բուլղարիային»,- պատասխանել է եվրոպամետ կոալիցիայի անդամ Մարտին Դիմիտրովը։

Բուլղարիայի նպատակն է, որ երկիրը միանա Եվրագոտուն ամենաուշը մինչև 2025 թվականի կեսերը, չնայած փորձագետների մեծամասնության կարծիքով՝ 2026 թվականի հունվարի 1-ը ամենաիրատեսականն է՝ հաշվի առնելով երկրում առկա քաղաքական ճգնաժամը: