Օրինագծի համաձայն՝ չեղարկվում են այն կանոնները, որոնք վարչական իրավախախտում կատարելու դեպքում անձին հնարավորություն էին տալիս ժամանակից շուտ վերականգնել տրանսպորտային միջոց վարելու իրավունքը։ Համապատասխան փոփոխությունները ներկայացվել են խորհրդարանի բյուրոյի երեկվա նիստում։

Ինչպես նշվում է օրինագծում, այն անձը, ով մինչև 2025 թվականի դեկտեմբերի 10-ը կատարել է Վրաստանի «Վարչական իրավախախտումների օրենսգրքի» 116-րդ և/կամ 123-րդ հոդվածներով սահմանված իրավախախտում, մեկ անգամ ազատվում է այդ իրավախախտման համար նշանակված վարչական պատասխանատվությունից՝ վարելու իրավունքի կասեցումից, սակայն նա միևնույն է համարվում է պատասխանատվության ենթարկված։

Նախագծում նշվում է, որ վարելու իրավունքի կասեցումից ազատվելու համար անձին անհրաժեշտ չէ դիմել որևէ համապատասխան մարմնի կամ պաշտոնատար անձի։ Ազատումը կիրականացվի մինչև 2026 թվականի փետրվարի 1-ը։

Օրինագծով սահմանվում է, որ Ներքին գործերի նախարարությունը օրենքով սահմանված կարգով կպահանջվի հրապարակել պաշտոնական կայքում այն անձանց ցուցակը, որոնք ազատվել են վարչական պատժից՝ վարելու իրավունքի կասեցումից։ Այս տեղեկատվության հրապարակումից անմիջապես հետո վերականգնվելու է այդ անձանց վարելու իրավունքը։

Հատուկ անցումային դրույթով նաև սահմանվում է, որ այն անձինք, ովքեր մինչև 2025 թվականի դեկտեմբերի 10-ը կատարել են Վրաստանի վարչական իրավախախտումների օրենսգրքի 45-րդ, 451-րդ և/կամ 115²-րդ հոդվածներով նախատեսված իրավախախտում, նույնպես մեկ անգամ ազատվում են վարչական պատժից՝ վարելու իրավունքի կասեցումից։

Այս դեպքում, անձը պետք է դիմի ծառայությունների գործակալություն՝ իր վարելու իրավունքի վերականգնման նպատակով։ Այդ իրավունքը կարող է վերականգնվել պետական փորձագիտական հաստատության կողմից տրամադրված դատաբժշկական փորձաքննության (դինամիկ-թմրանյութաբանական ստուգման) եզրակացության ներկայացման և օրենսդրությամբ սահմանված պահանջների բավարարման հիմքով։

Բացի այդ, անցումային դրույթներով նախատեսվում է, որ այն անձանց, ում մինչև 2025 թվականի դեկտեմբերի 10-ը «Ճանապարհային երթևեկության մասին» օրենքի համաձայն վարելու իրավունքը կասեցվել է վարկային միավորների սպառման պատճառով, 2026 թվականի հունվարի 1-ից վարելու իրավունքը կվերականգնվի, և վարորդական վկայականին նորից կտրամադրվի 100 միավոր։

Վարելու իրավունքի վերականգման և 100 միավորի վերնշանակման համար անձին անհրաժեշտ չէ դիմել որևէ լիազոր մարմնի կամ պաշտոնատար անձի։

Օրինագծով հստակեցվում է, որ համապատասխան մարմինները կամ պաշտոնատար անձինք, որոնք իրավասու են վարելու իրավունքի հարցերը քննարկելու, պարտավոր են մինչև 2026 թվականի հունվարի 1-ը ապահովել այդ իրավունքի վերականգնումը և վկայականին 100 միավորի տրամադրումը։

Օրինագծում բերված է նաև վիճակագրություն այն մասին, թե քանի մարդու վարելու իրավունք է կասեցված։

«Գոյություն ունեցող վիճակագրական տվյալներով՝ այս պահի դրությամբ կասեցված է ընդհանուր 35 445 վարորդական վկայական, այդ թվում՝

Ալկոհոլային հարբածության հիմքով – 18 310

ՃՏՊ կատարելու և դեպքի վայրից հեռանալու համար – 1 134

Թմրանյութերի օգտագործման համար – 3 504

Վարկային միավորների սպառման համար – 781

Քրեական հանցագործության համար կայացված դատավճռի հիմքով – 327

Այլ պատճառներով, այդ թվում՝ նախկին վարչական տուգանքների չվճարման պատճառով – 11 389», – նշված է նախագծում։