Թբիլիսիի քաղաքային դատարանը քննում է Վրաստանի նախկին նախագահ Միխեիլ Սաակաշվիլիի պատիժը հետաձգելու կամ պատժից ազատելու հարցը։ Դատավարության ժամանակ հարցաքննվում է բրիտանացի հոգեբույժ Կոռնելիուս Կատոնիսը։ Նա հանդիպմանը միանում է հեռակա կարգով։

Նրա խոսքով՝ Միխեիլ Սաակաշվիլին ունի հետտրավմատիկ, ինչպես նաև նյարդաճանաչողական խանգարում։

«2022 թվականի նոյեմբերին ես հիվանդանոցում տեսա Միխեիլ Սաակաշվիլիին։ Ես նրա հետ անցկացրի մոտ երեք ժամ։ Ամբողջությամբ ուսումնասիրեցի նրա անամնեզը, կատարեցի մանրամասն ճանաչողական գնահատում։ Հետազոտության արդյունքում հայտնաբերեցի ուշադրության, հիշողության, լեզվի և տեսողական-տարածական ընկալման բավականին ծանր խանգարումներ։ Նա ունի հետտրավմատիկ սթրեսային խանգարում, ինչպես նաև նյարդաճանաչողական խանգարում: Կան մի քանի հնարավոր պատճառներ, որոնք կարող էին մեզ բերել այս կետին:

Առաջին պատճառը կարող է լինել քաղցը, ինչպես նաև էպիլեպտիկ նոպաները։ Ես հաստատում եմ եզրակացության մեջ գրվածը, որ Միխեիլ Սաակաշվիլին պատշաճ բուժում չի ստացել։ Նրա բուժումը արդյունավետ չի լինի այնպիսի միջավայրում, որտեղ նա իրեն ապահով չի զգում և վտանգված է զգում: Ես գիտեմ, որ Վրաստանի օրենսդրության համաձայն, դեմենցիա ունեցող անձինք չպետք է պատիժ կրեն։ Նրա բանտարկությունը կանխում է նրա դեմենցիայի և հետտրավմատիկ սթրեսային խանգարման համարժեք բուժումը: Նա պետք է բուժվի մի երկրում, որտեղ նա իրեն ապահով է զգում։ Նա ծանր ու խրոնիկ հիվանդ է»,- ասաց հոգեբույժը։

Սաակաշվիլիի փաստաբանները դիմել են դատարան՝ Վրաստանի նախկին նախագահի նկատմամբ պատիժը հետաձգելու կամ պատժից ազատելու համար։ Դատավոր Գիորգի Արեւաձեն քննում է նշված միջնորդությունը։