«Բլումբերգ» – Էրդողանը մտադիր է «Մեծ դասակի» գագաթնաժողովին ներկայացնել Ռուսաստան-Ուկրաինա պատերազմի «խաղաղության ծրագիր», որը ներառում է կողմերի ներկայիս դիրքերում ռազմական գործողությունների սառեցում
Թուրքիայի նախագահ Ռեջեփ Թայիփ Էրդողանը պատրաստվում է «Մեծ դասակի» գագաթնաժողովին ներկայացնել «խաղաղության ծրագիր»՝ կապված Ռուսաստան-Ուկրաինա պատերազմի հետ։
Այդ մասին Bloomberg-ին հայտնել են անանուն աղբյուրները։ Գործակալության տվյալներով՝ Էրդողանի առաջարկը նախատեսում է կողմերի ներկայիս դիրքերում ռազմական գործողությունների սառեցում։
Ըստ լրատվամիջոցի՝ Թուրքիայի նախագահն առաջարկում է նաև առնվազն 10 տարով հետաձգել ՆԱՏՕ-ին Ուկրաինայի անդամակցության քննարկումը։
Թուրքիայի առաջարկը նախատեսում է նաև ապառազմականացված գոտու ստեղծում արևելյան Դոնբասում, որտեղ Ռուսաստանը 2014 թվականից զգալի տարածքներ է վերահսկում։
«Էրդողանի առաջարկը նախատեսում է միջազգային ուժերի տեղակայում այս տարածքում՝ որպես լրացուցիչ երաշխիք և զենքի տրամադրում Ուկրաինային՝ որպես փոխհատուցում ՆԱՏՕ-ին անդամակցելուց հրաժարվելու համար»,- նշում է Bloomberg-ը։
Bloomberg-ի փոխանցմամբ՝ թուրք պաշտոնյաները խոստովանում են, որ Ուկրաինայի համար դժվար կլիներ ընդունել նման առաջարկը, սակայն կարծում են, որ դա ամենաիրատեսական մոտեցումն է։
«Նրանք փորձում են հետաձգել օկուպացված տարածքների երկարաժամկետ ճակատագրի շուրջ քննարկումները և կենտրոնանալ առաջին հերթին կայուն զինադադարի ապահովման վրա»,- ասվում է հրատարակության մեջ։
Գործակալության աղբյուրները նշել են, որ «Էրդողանը հույս ունի համոզել Զելենսկիին համաձայնել մասնակցել Ստամբուլում խաղաղ բանակցություններին, քանի որ նա տեսել է հետախուզական տվյալներ, որոնք ցույց են տալիս, որ Ուկրաինան կարող է շատ ավելի շատ տարածքներ կորցնել առաջիկա մի քանի ամիսների ընթացքում, եթե մարտերը չդադարեն»: