Շվեյցարական Credit Suisse բանկի տրաստը խոստովանել է, որ չի տեղեկացրել իր միլիարդատեր հաճախորդին իր հաշիվներից չարտոնված փոխանցումների մասին, ասվում է «Bloomberg» հրատարակության հրապարակած հոդվածում։ Ինչպես նշում է հրատարակությունը, սա անսպասելի քայլ է, որը կարող է որոշել Սինգապուրում ընթացող դատավարության արդյունքը։

Ըստ լրատվամիջոցի՝ դատավարության առաջին ինն օրերի ընթացքում Credit Suisse տրաստի առաջատար իրավաբան Լի Էնգ Բանգը պնդում էր, որ իր ընկերության պատասխանատվությունը սահմանափակվում է Բիձինա Իվանիշվիլիին պատկանող ակտիվների կառավարմամբ, և որ ինքը՝ մագնատը, կամ նրա վրացի բիզնես-խորհրդատուն որոշումներ է կայացրել ներդրումների վերաբերյալ և պետք է պատասխանատվություն կրի բոլոր վնասների համար: Սակայն ուրբաթ կեսօրին Լին նախագահող դատավորի առջև խոստովանեց, որ խախտել է իր հավատարմության պարտականությունները՝ կապված Meadowsweet հավատարմագրային ընկերությունում Իվանիշվիլիի ներդրումների հետ:

«Նա ընդունում է, որ 2008 թվականի դեկտեմբերի 31-ի դրությամբ նա պետք է ողջամիտ քայլեր ձեռնարկեր Meadowsweet Assets Limited-ի բանկային հաշիվներից չարտոնված փոխանցումների հարցը լուծելու համար, այդ թվում՝ անձամբ կապ հաստատել պարոն Իվանիշվիլիի հետ՝ ստուգելու Meadowsweet-ի բանկային հաշվից փոխանցումների օրինականությունը- ասվում է հոդվածում։

Bloomberg-ը հայտնում է, որ Վրաստանի նախկին վարչապետ Բիձինա Իվանիշվիլին դատի է տվել տրաստին 800 միլիոն դոլարի վնասի և կորցրած եկամուտի համար, որը, ըստ նրա, պետք է ստանար տարիների ընթացքում, եթե այդ գումարները ապահով ներդրված լինեին։ Իվանիշվիլին անցյալ շաբաթ դատարանում ցուցմունք տվեց, որ բացի ռուսական բաժնետոմսերում որոշ ներդրումներից, որոնք նա կատարել է Credit Suisse-ի միջոցով վաղ փուլում, նա ոչինչ չի կառավարել և ներդրումային որոշումները թողել է կեղծ բանկիր Պատրիկ Լեսկադրոնին։

Հոդվածի համաձայն՝ 2018 թվականին դատարանը Լեսկադրոնին մեղավոր է ճանաչել նախկին հաճախորդների, այդ թվում՝ Իվանիշվիլիի ստորագրությունները ութ տարվա ընթացքում կեղծելու մեջ։

Մարտին Իվանիշվիլին շահեց Բերմուդյան կղզիների դատարանում 607 միլիոն դոլարի հայցը, որը պարզեց, որ Credit Suisse-ի տեղական ապահովագրական բաժինը աչք է փակել Լեսկադրոնի խարդախության վրա: Credit Suisse-ը բողոքարկել է որոշումը։

«Bloomberg»-ի փոխանցմամբ՝ Իվանիշվիլիի և շվեյցարական բանկի ներկայացուցիչները չեն մեկնաբանել Credit Suisse տրեստի փաստաբանի հայտարարությունը Սինգապուրի դատարանում։

Նույն հոդվածում նշվում է, որ դատավարությունը կշարունակվի ևս մեկ շաբաթ՝ երկու կողմերի ցուցմունքներով և եզրափակիչ խոսքով։ Վճիռը սպասվում է 2023 թվականի առաջին կիսամյակում։