Բելգրադի երկաթուղային կայարանում տեղի ունեցած միջադեպի կապակցությամբ հարյուրավոր մարդիկ բողոքի ցույց են անցկացրել
Բելգրադի երկաթուղային կայարանում տեղի ունեցած միջադեպի կապակցությամբ հարյուրավոր մարդիկ բողոքի ցույց են անցկացրել։
Ցուցարարները մեղադրել են իշխանություններին անփութության և կոռուպցիայի մեջ այն բանից հետո, երբ Սերբիայի Նովի Սադ քաղաքի երկաթուղային կայարանում բետոնե տանիքը փլուզվել է, որի հետևանքով զոհվել է 14 մարդ:
Հանրահավաքի մասնակիցները «Ձեռքերիդ արյուն է» և «Կոռուպցիան սպանում է» գրություններով պաստառներ են պահել։ Ցուցարարները վանկարկել են՝ «Ձերբակալեք նախագահ Ալեքսանդր Վուչիչին»։
Ինչպես գրում է «Reuters»-ը, սերբ ընդդիմադիր քաղաքական գործիչները, ակտիվիստները և իրավապաշտպան կազմակերպությունները Վուչիչին և կառավարությանը մեղադրում են կոռուպցիայի, կազմակերպված հանցավորության հետ կապերի, նեպոտիզմի և չափից դուրս բյուրոկրատիայի մեջ։
Վուչիչը և նրա դաշնակիցները հերքում են այդ մեղադրանքները։ Սերբիայի վարչապետ Միլոշ Վուչևիչը հայտարարել է, որ իշխանությունները հետաքննում են, թե ով է պատասխանատու աղետի համար։ Քաղաքի դատախազությունը հայտնել է, որ քննիչները միջադեպի առնչությամբ հարցաքննել են 26 մարդու, այդ թվում՝ տրանսպորտի նախարար Գորան Վեշիչին, և ձեռք են բերել կարևոր փաստաթղթեր: Բացի այդ, հարցաքննության է հրավիրվել 14 մարդ։
Հիշեցնենք, Սերբիայի Նովի Սադ քաղաքի երկաթուղային կայարանի բետոնե տանիքը փլուզվել է և ընկել սպասասրահում նստած մարդկանց վրա։ Արդյունքում մահացել է 14 մարդ։