Բելգիայի բանակի նախկին բարձրաստիճան պաշտոնյան ասում է, որ եթե պատերազմ սկսվի, բելգիացի զինվորները ստիպված կլինեն «քարեր նետել», քանի որ երկու ժամից սպառազինությունը կվերջանա։

Ինչպես Բելգիայի Հանրային հեռարձակողի հետ զրույցում հայտարարել է պաշտոնաթող գեներալ-լեյտենանտ Մարկ Թիսը, բանակը տառապում է զենքի և զինամթերքի պակասից։

Նրա պարզաբանմամբ, որպեսզի բելգիական բանակը հնարավոր հարձակման դեպքում պատրաստ լինի առնվազն երկու ամիս դիմադրելու, անհրաժեշտ է 5-7 միլիարդ եվրոյի ֆինանսավորում։

«Իմ ծառայության ժամանակ բանակին զինամթերք գնելու համար տարեկան 15 միլիոն էին տալիս, հիմա այս գումարը հասել է 150 միլիոնի, բայց դա բավարար չէ։ Եթե ​​պատերազմը սկսվի, զինվորները ստիպված կլինեն քարեր նետել, քանի որ եղած զենքերը մի քանի ժամից կսպառվեն»,- ասել է բելգիացի գեներալը։