Բեքա Ձամաշվիլի.Վրաստանի օրենսդրության համաձայն՝ անձը պետք է իր պատիժը կրի Վրաստանի տարածքում, իսկ դատարանը որոշում է կայացնում պատիժը հետաձգելու մասին՝ կապված նրա առողջության հետ
«Ցանկացած բանտարկյալի առողջության մասին խոսելիս արդարադատության նախարարության դիրքորոշումն այն է, որ բժիշկներն ու մասնագետները պետք է խոսեն առողջական վիճակի մասին։ Սաակաշվիլին գտնվում է մասնավոր բժշկական կլինիկայում և նրա առողջության հետ կապված որոշակի հարցեր առաջանալուց հետո Արդարադատության նախարարությունն անմիջապես համապատասխան հետազոտություն է նշանակել՝ բացառելու ցանկացած շահարկում»,- ասել է արդարադատության փոխնախարար Բեքա Ձամաշվիլին։
Ձամաշվիլիի խոսքով՝ կոնկրետ հարցերի մասին հնարավոր կլինի խոսել փորձագետների եզրակացություններից հետո։ Նրա հայտարարության համաձայն՝ նախարարությունը կքննարկի փորձագետների առաջարկությունները։
Ինչ վերաբերում է Միխեիլ Սաակաշվիլիի պատժաչափի հետաձգմանը, Բեքա Ձամաշվիլիի խոսքերով, «դա դատարանի իրավասությունն է և դատարանն առաջնորդվում է կոնկրետ եզրակացությամբ»։
Արդարադատության փոխնախարարի խոսքով՝ Արդարադատության նախարարությունը չի կարող որևէ որոշում կայացնել Միխեիլ Սաակաշվիլիի արտերկիր տեղափոխման հետ կապված։
«Մենք ապրում ենք օրինական պետությունում։ Վրաստանի օրենսդրության համաձայն՝ պատիժը կրող անձը պետք է պատիժը կրի Վրաստանի տարածքում։ Եթե առկա է առանձնահատուկ առողջական վիճակ, որը ենթադրում է պատժի ժամկետի հետաձգում, դատարանը կայացնում է այս որոշումը, գրված է օրենսդրության մեջ։ Ըստ այդմ՝ արդարադատությունը ենթարկվելու է օրենքին։ Արդարադատությունը օրենսդրությունը շրջանցելով որևէ գործողություն անելու իրավունք կամ իրավասություն չունի»,- ասել է Ձամաշվիլին։
Լրագրողները Բեքա Ձամաշվիլիին հարցրել են Սաակաշվիլիի հնարավոր թունավորման հետ կապված տարածված տեղեկատվության մասին, փոխնախարարի խոսքով՝ Միխայիլ Սաակաշվիլին՝ ինքն էլ ասել է, որ երբեք նման կասկածներ չի ունեցել։
«Ինքը՝ Սաակաշվիլին, գնահատական տվեց, որ ինքը երբեք կասկածներ չի ունեցել, և հենց այդ կասկածները բացառելու համար է նշանակվել փորձաքննությունը։ Նախարարությունն արեց ամեն ինչ. Նշանակել ենք փորձաքննություն և եզրակացությունից հետո հնարավոր կլինի լրացուցիչ մեկնաբանություններ անել։ Արդարադատության նախարարի դիրքորոշումն առաջին իսկ օրվանից այն էր, որ բանտարկյալին պետք է ցուցաբերվի համապատասխան բուժում:Այդ իսկ պատճառով նա գտնվում է կլինիկայում։ Նրան կտրամադրեն բոլոր անհրաժեշտ բուժումները բժիշկների կողմից, հետևաբար, եթե որևէ լրացուցիչ բուժում անհրաժեշտ լինի, իհարկե նախարարությունը կաջակցի դրան և կլինի նախաձեռնողը։ Փորձագետներն ու բժիշկները պետք է որոշում կայացնեն այս հարցում»,- ասել է Բեքա Ձամաշվիլին։
Բեքա Ձամաշվիլին, խոսելով Միխեիլ Սահակաշվիլիի առողջական վիճակի վերաբերյալ Սամխարաուլիի փորձագիտական զեկույցի մասին, ասել է, որ դեռ հայտնի չէ, թե երբ կհրապարակվի նշված զեկույցը։
«Չեմ կարող ասել, թե դա երբ կլինի։ Փորձաքննությունների բյուրոյի որոշելիքն է, թե երբ նրանք կկարողանան ներկայացնել վերը նշվածը: Եթե փորձագետի համար կոնկրետ տերմին սահմանեինք, դա միջամտություն կլիներ նրանց աշխատանքին։ Ուստի նրանք ունեն լիակատար ազատություն, թույլատրվում է ուսումնասիրել հիվանդի վիճակը և երբ նրանք պատրաստ զգան զեկույց գրել, այն կհրապարակվի։ Նախարարությունը չի կարող ազդել այդ գործընթացների վրա, այդ թվում՝ կոնկրետ ժամկետների մասով։ Նախարարությունը, սակայն, կասկածներ առաջանալուն պես անմիջապես արձագանքել է, չնայած այն բանին, որ բանտարկյալն ինքը հայտարարել է, որ թունավորման կասկածներ չկան։ Որևէ շահարկում բացառելու համար փորձաքննությունն անմիջապես նշանակվել է»,- ասել է Ձամաշվիլին։
