Եվրադատարանը նշել է, որ Ռուսաստանը արդյունավետ ռազմական, քաղաքական և տնտեսական վերահսկողություն է իրականացրել Աբխազիայի վրա նույնիսկ պատերազմից առաջ, հետևաբար Ռուսաստանը պատասխանատվություն է կրում մարդու իրավունքների բոլոր խախտումների համար,- այս մասին մեկնաբանելով Մարդու իրավունքների եվրոպական դատարանի կողմից «Մամասախլիսի և այլոք ընդդեմ Ռուսաստանի» գործով կայացված որոշումը հայտարարել է Արդարադատության փոխնախարար Բեքա Ձամաշվիլին։

Նրա խոսքով, Վրաստանը Ստրասբուրգի դատարանում տարավ եւս մեկ շատ կարեւոր հաղթանակ։

«Ինչպես հայտնի է հանրությանը, պատերազմի գործով Վրաստանն արդեն շահել էր բացարձակապես բոլոր վեճերը՝ թե՛ Ստրասբուրգի, թե՛ Հաագայի դատարաններում։ Այսօրվա որոշմամբ՝ «Մամասախիսին և այլոք ընդդեմ Ռուսաստանի» գործում Ռուսաստանի Դաշնության պատասխանատվությունն արդեն ընդգծվել է 2008 թվականի պատերազմին նախորդած ժամանակահատվածի համար։ Մասնավորապես, այս որոշման մեջ Եվրոպական դատարանը նշել է, որ նույնիսկ պատերազմից առաջ Ռուսաստանի Դաշնությունը արդյունավետ ռազմական, քաղաքական և տնտեսական վերահսկողություն է իրականացրել Աբխազիայի նկատմամբ, հետևաբար, այստեղ կատարված մարդու իրավունքների բոլոր խախտումների համար պատասխանատվությունը դրվել է Ռուսաստանի վրա։

2012 թվականից ի վեր Վրաստանի կառավարության ողջամիտ ու սկզբունքային ջանքերի արդյունքում արդեն կարելի է ասել, որ Ստրասբուրգի և Հաագայի դատարաններում բացարձակապես բոլոր վեճերը շահված են՝ թե՛ պատերազմի ժամանակ, թե՛ պատերազմից հետո, թե՛ նույնիսկ պատերազմից առաջ։ Կարևորվել է Ռուսաստանի Դաշնության կողմից օկուպացիայի փաստը և 90-ականներից մինչ օրս շարունակական օկուպացիայի շրջանակներում իրավական պատասխանատվության շարունակական պարտավորությունը»,- նշել է Ձամաշվիլին։