Բաքվում հայտարարում են, որ խաղաղության պայմանագիրը կստորագրեն Հայաստանի սահմանադրությունում տարածքային հավակնությունները կարգավորելուց հետո, իսկ Փաշինյանի խոսքով՝ սահմանադրության նախագիծը կհրապարակվի մինչև տարեվերջ
Հայաստանի վարչապետ Նիկոլ Փաշինյանը հայտարարում է, որ Հայաստանի նոր սահմանադրության նախագծի տեքստը կհրապարակվի մինչև տարեվերջ։ Այս մասին Նիկոլ Փաշինյանը նշել է Ադրբեջանի արտաքին գործերի նախարար Ջեյհուն Բայրամովի հայտարարությանն ի պատասխան։
Մասնավորապես, Ջեյհուն Բայրամովը ևս մեկ անգամ կրկնել է Բաքվի պահանջը Հայաստանի մայր օրենքում փոփոխություններ կատարելու վերաբերյալ։ Բայրամովի խոսքով՝ Հայաստանի սահմանադրության մեջ առկա տարածքային պահանջների կարգավորումից հետո խաղաղության պայմանագրի ստորագրումը հնարավոր է արդեն իսկ հաջորդ օրը։
Հայաստանի վարչապետի խոսքով՝ դելիմիտացիայի (սահմանազատման) և էքսկլավների հարցերը կլուծվեն միայն Ալմա-Աթայի հռչակագրի հիման վրա։
«Առաջարկությունների ներկայացման վերջնաժամկետը լրացել է, դրանք քննարկվել են, և մեկ վերջնական հարցի վերաբերյալ որոշումը դեռևս պետք է ընդունվի։ Կոնկրետ ժամկետ այս պահին չեմ նշի, բայց տեքստը կհրապարակենք մինչև տարեվերջ»,— պարզաբանել է Փաշինյանը։
Հայաստանի վարչապետի հայտարարությամբ՝ Երևանը սկզբունքորեն չի քննարկում իր ներքին հարցերը արտաքին քաղաքականության ասպարեզում, և սահմանադրական բարեփոխումների օրակարգը իշխող կուսակցության նախընտրական պլատֆորմի մասն է, որին քվեարկել է 726 000 քաղաքացի։