Ազգային վիճակագրական ծառայության տվյալների համաձայն՝ 2024 թվականի հուլիսին շինարարության արժեքի ցուցանիշը նախորդ ամսվա համեմատ աճել է 0,9 տոկոսով։

Ազգային վիճակագրական ծառայության նշված փոփոխությունը հիմնականում պայմանավորվել է շինարարության ոլորտում վարձու աշխատողների միջին ամսական անվանական աշխատավարձի 5,4 տոկոս աճով, ինչը 1,06 տոկոսային կետով նպաստել է ընդհանուր ցուցանիշի փոփոխությանը։

«Նախորդ տարվա համապատասխան ամսվա համեմատ շինարարության արժեքի ցուցանիշն աճել է 7,8 տոկոսով։ Ցուցանիշի աճն առավելապես պայմանավորվել է շինարարության ոլորտի աշխատողների միջին ամսական անվանական աշխատավարձի 24,5 տոկոսով և շինանյութի 3,3 տոկոսով թանկացմամբ, ինչը համապատասխանաբար 4,65 և 1,95 տոկոսային կետով նպաստել է ընդհանուր ցուցանիշի փոփոխությանը։ Բացի այդ, 2022 թվականի փետրվարի համեմատ շինարարության արժեքի ինդեքսն աճել է 18,3 տոկոսով»,- նշվում է Ազգային վիճակագրական ծառայության հրապարակած զեկույցում։