Ազգային վիճակագրական ծառայության տվյալների համաձայն՝ 2024 թվականի օգոստոսին շինարարության արժեքի ցուցանիշը նախորդ ամսվա համեմատ աճել է 1,1 տոկոսով։

Ազգային վիճակագրական ծառայության այս փոփոխությունը հիմնականում պայմանավորված է շինանյութերի գների 1,0 տոկոս աճով, ինչը 0,59 տոկոսային կետով նպաստել է ընդհանուր ցուցանիշի փոփոխությանը։

«Նախորդ տարվա համապատասխան ամսվա համեմատ շինարարության արժեքի ցուցանիշն աճել է 7,9 տոկոսով։ Ցուցանիշի աճն առավելապես պայմանավորվել է շինարարության աշխատողների միջին ամսական անվանական աշխատավարձի 29,7 տոկոսով և շինանյութի 3,8 տոկոսով թանկացմամբ, որոնք ընդհանուր ցուցանիշի փոփոխությանը նպաստել են համապատասխանաբար 4,59 և 2,29 տոկոսային կետով։ Բացի այդ, 2022 թվականի փետրվարի համեմատ շինարարության արժեքի ինդեքսն աճել է 19,7 տոկոսով»,- նշվում է Ազգային վիճակագրական ծառայության հրապարակած տեղեկատվության մեջ։