Վրաստանի Ազգային բանկի փոխնախագահ Պապունա Լեժավան ասում է, որ մայիսի 10-ին կքննարկվի վերաֆինանսավորման տոկոսադրույքի նվազեցման հարցը, սակայն որոշման մասին նախապես խոսել չի կարող։

«Մայիսի 10-ին կունենանք դրամավարկային քաղաքականության հանձնաժողով։ Ինձ համար դժվար կլինի կանխատեսումներ անել։ Նախնական տվյալներով՝ մոտավորապես նույն ակնկալիքներն ունենք, ինչ ունեինք տարեսկզբին։ Մենք ասացինք, որ երկրորդ կիսամյակից հնարավոր կլինի սկսել դրամավարկային քաղաքականության մեղմացումը։ Անգամ նախորդ հանձնաժողովներում այդ հարցը չենք քննարկել, քանի որ ռիսկերը դեռ բարձր էին։ Հաջորդ հանձնաժողովում մենք անպայման ակտիվ քննարկում կունենանք վերաֆինանսավորման տոկոսադրույքի նվազեցման ուղղությամբ, սակայն նախապես չենք կարող ասել, թե ինչ որոշում կկայացնենք այս կապակցությամբ»,- ասել է Լեժավան։

Նրա խոսքով, ընթացիկ գնաճը նվազում է և մոտենում է նպատակային ցուցանիշին, թեև դա դեռ մեծապես պայմանավորված է արտաքին գործոններով։

«Ինչ վերաբերում է ներքին գործոններին, ապա տարեկան գնաճը նպատակայինից բարձր է և կազմում է վեց տոկոս։ Ներքին գնաճը նույնպես նվազման միտում ունի, թեև պետք է այնպես անել, որ այդ միտումն անշրջելի լինի և հետընթացի ռիսկեր չլինեն։ Ներքին գնաճը հիմնականում վերաբերում է Վրաստանում արտադրվող ծառայություններին և ապրանքներին։ Միգրացիայի ազդեցությունը դեռևս բարձր է, թեև մեկ տարի է, ինչ սկսվել է միգրացիոն ալիքը, և դա բնական բազային էֆեկտ է ունենալու։ Նաեւ մեր վիճակագրության մեջ, երբ միգրանտը մեկ տարուց ավելի է մնում, նա այլեւս զբոսաշրջիկ չի համարվում, նա արդեն համարվում է տեղի բնակիչ։ Հետևաբար, որոշ վիճակագրական տեղաշարժեր կարող են ունենալ, թեև այսօրվա դրությամբ միգրանտների ազդեցությունը դեռ բարձր է: Մինչեւ մայիսի 10-ը լրացուցիչ տեղեկություն կստանանք, իսկ դրանից հետո որոշում կկայացնենք»,- նշել է Լեժավան։