«ՎՏԲ բանկի» հնարավոր օտարման վերաբերյալ Վրաստանի Ազգային բանկը պարզաբանում է, որ թույլտվության ոչ մի պահանջ Ազգային բանկ պաշտոնապես չի ներկայացվել։

Ազգային բանկը նշում է, որ ցանկացած գործարք տեղի է ունենալու թափանցիկ՝ միայն միջազգային պատժամիջոցների պահանջների և գործող օրենսդրության լիարժեք պահպանմամբ։

«Մեզ հայտնի է, որ «ՎՏԲ բանկի» գնման հետ կապված հետաքրքրությունները շատ են, թեպետ թույլտվության ոչ մի հայտ պաշտոնապես չի ներկայացվել Ազգային բանկ։ Այս փուլում մենք իրավունք չունենք հրապարակայնորեն հայտարարել կոնկրետ ընկերություններ ու անուններ։ Այնուամենայնիվ, մենք կարող ենք ձեզ վստահեցնել, որ ցանկացած գործարք կիրականացվի թափանցիկ՝ միայն միջազգային պատժամիջոցների պահանջներին և գործող օրենսդրությանը լիովին համապատասխան։ Հաշվի առնելով այն հանգամանքը, որ «ՎՏԲ Բանկի» նկատմամբ պատժամիջոցներ են կիրառվել ԱՄՆ ֆինանսների նախարարության կողմից, հետևաբար, դրա առքուվաճառքի հետ կապված ցանկացած գործարք պետք է համաձայնեցվի կողմերի կողմից»,- նշում են Ազգային բանկը։