Խորհրդարանի պաշտպանության հանձնաժողովի նախագահ Իրակլի Բերաիայի խոսքով՝ Վրաստանի ազգային անվտանգության հայեցակարգի թարմացման աշխատանքները գործնականում ավարտված են, և փաստաթուղթը հաջորդ տարվա սկզբին կներկայացվի օրենսդիր մարմնի հաստատմանը։

Ինչպես լրագրողներին ասել է Բերաիան, պաշտպանության հանձնաժողովի նախաձեռնությամբ օրենսդրական փոփոխություններ են կատարվել, որոնցով ազգային անվտանգության հայեցակարգի վերանայման պարտադիր ժամկետ է սահմանվել հինգ տարի։

Նրա խոսքով, փաստաթուղթը կարտացոլի այն բոլոր մարտահրավերները, որոնք երկիրն ունի անվտանգության առումով։

«Կպատկերվեն այն արժեքները, որոնց վրա հիմնված է մեր անվտանգության քաղաքականությունը։ Ազգային անվտանգության առաջնահերթություններն ու հիմնական ոլորտները նույնպես կարտացոլվեն առաջնահերթությունների շրջանակում»,- ասել է Բերաիան։