Վրացի ազատ ոճի ըմբիշ Գենո Պետրիաշվիլին (-125 կգ) օլիմպիական չեմպիոն է։

Մրցումների եզրափակիչում Պետրիաշվիլին 10:9 հաշվով հաղթեց աշխարհի կրկնակի չեմպիոն, 23-ամյա իրանցի մարզիկ Ամիր Հոսեյն Զարեին և Վրաստանին բերեց Փարիզի Օլիմպիական խաղերի հինգերորդ մեդալը։

30-ամյա վրացի մարզիկը երեկ է սկսել ելույթները Օլիմպիական խաղերում։ 16-րդ տուրում նա 11:0 հաշվով հաղթեց ուկրաինացի Խոցիանիվսկուն, քառորդ եզրափակչում 9:2 հաշվով հաղթեց լեհ Ռոբերտ Բարանին, իսկ կիսաեզրափակչում 7:0 հաշվով առավելության հասավ Ադրբեջանի անունից հանդես եկող Գիորգի Մեշվիլդիշվիլիի նկատմամբ:

Մինչ այժմ Պետրիաշվիլիին պատկանում էր Ռիոյի Օլիմպիական խաղերի բրոնզե և Տոկիոյի Օլիմպիական խաղերի արծաթե մեդալ։ Նա նաև եռակի աշխարհի և Եվրոպայի կրկնակի չեմպիոն է։

Հիշեցնենք, որ վրացական պատվիրակությունը Փարիզում կայացած Օլիմպիական խաղերում չորս մեդալ է նվաճել։ Օլիմպիական խաղերի չեմպիոն դարձավ Լաշա Բեքաուրին, արծաթե մեդալներ նվաճեցին Իլիա Սուլամանիձեն և Տատո Գրիգալաշվլին, իսկ Լաշա Գուրուլին նվաճեց բրոնզը։

Այսօր ավելի ուշ պայքարի մեջ կմտնի Լաշա Տալախաձեն, իսկ վաղը՝ օգոստոսի 11-ին, ազատ ոճային ըմբիշ Գիվի Մաճարաշվիլին (97 կգ) կպայքարի ոսկե մեդալի համար։