Մեթյու Քրուքսը, ով կրակել էր Դոնալդ Թրամփի վրա Բաթլերում, իր բջջային հեռախոսում ուներ 45-րդ նախագահ Դոնալդ Թրամփի, գործող նախագահ Ջո Բայդենի և այլ պաշտոնյաների, այդ թվում՝ գլխավոր դատախազ Մերիկ Գարլանդի և FBI-ի տնօրեն Քրիս Ռեյի լուսանկարները, գրում է «Associated Press»-ը:

Ըստ անանուն աղբյուրի՝ քննիչները նաև պարզել են, որ 20-ամյա Քրուքսը համացանցում որոնում էր Դեմոկրատների ազգային կոնվենցիայի ժամկետները, ինչպես նաև Թրամփի հայտնվելու ամսաթիվը։

Բացի այդ, ըստ նրանց, հետաքննությունը դեռ շարժառիթը պարզելու ուղղությամբ չի առաջադիմել։

Associated Press-ը հայտնում է, որ հրաձիգը նաև տեղեկատվություն էր փնտրում դեպրեսիվ խանգարման մասին, սակայն քննիչները դեռ չեն պարզել, թե արդյոք Մեթյու Քրուքսն ուներ այդ խանգարումը:

Սակայն, ինչպես գրում են լրատվամիջոցները, ուսումնասիրությունները ցույց են տվել, որ հոգեկան հիվանդություններ ունեցող մարդկանց ճնշող մեծամասնությունը բռնություն չի ցուցաբերում, իսկ մասնագետները նշում են, որ բռնի մարդկանց մեծ մասը հոգեկան հիվանդություններ չունի։

Լրատվամիջոցների տվյալներով՝ Թրամփի ելույթից քիչ առաջ իրավապահները նկատել են Քրուքսին, ով մեծ ուսապարկով քայլում էր հանրահավաքի միջով և նայում էր բեմի հետևում գտնվող տանիքներին, սակայն ոստիկանները ամբոխի մեջ կորցրեցին կասկածյալին: