Արևմտյան հետախուզական ծառայությունները կարծում են, որ մինչև տարեվերջ Ուկրաինային տարածքների «մեծ» կորուստ է սպասվում։

Այս մասին հայտնում են գերմանական լրատվամիջոցները։

Նյութում ասվում է, որ այս պահին Ուկրաինայի «ընդհանուր պատկերը» մշուշված է Ռուսաստանի գերակայությամբ։ Հետախուզության գնահատականում ասվում է, որ Կիևին չի հաջողվի «տիրանալ նախաձեռնությանը» 2024 թվականին, և երկիրը, ամենայն հավանականությամբ, մինչև տարեվերջ կունենա «զգալիորեն ավելի մեծ տարածքային կորուստներ»։

Արևմտյան հետախուզության տվյալներով՝ Ուկրաինայի կողմից տարածքների ակնկալվող կորուստը «Ուկրաինայի զինված ուժերի ներկայիս պաշտպանական կողմնորոշման և դրա հետ կապված մարտերի երկարաձգման հետևանք է»։

Գերմանիայի Բունդեսթագի խորհրդարանական վերահսկողական հանձնաժողովի փոխնախագահ Ռոդերիչ Կիզեվետերը հայտարարում է, որ Ուկրաինան զինամթերքի ու մոբիլիզացիայի խնդիր ունի։

Գերմանացի պատգամավորի խոսքով՝ ներկայումս «իրավիճակի մասին հոռետեսական տեղեկություններ են շրջանառվում»՝ ըստ երևույթին, նպատակ ունենալով «ցույց տալ, որ իրավիճակը անհուսալի է, և որ ռազմական աջակցությունն այլևս իմաստ չունի»:

Գերմանիայի իշխող Սոցիալ-դեմոկրատական ​​կուսակցության պատգամավոր Ռալֆ Շտեգները, որը նաև վերահսկիչ հանձնաժողովի անդամ է, ասել է, որ հետախուզական գործակալության գնահատականը «հիմնականում ճիշտ է»:

Գերմանացի պատգամավորի կարծիքով՝ անցյալ տարվա ուկրաինական անհաջող հակահարձակումը ցույց տվեց, որ «մենք կարող ենք և պետք է կանխենք Ուկրաինայի պարտությունը, բայց չենք կարող ապահովել նրա հաղթանակը»։