Խորհրդարանի նախագահ Արչիլ Թալակվաձեի հայտարարությամբ, քաղաքական կուսակցությունների միջև երկխոսության ռեժիմը չի ավարտվել:

Լրագրողների հետ զրույցում Արչիլ Թալակվաձեն չի կոնկրետացրել, թե ինչ հարցեր են քննարկվել հանդիպմանը, բայց շեշտել է, որ երկխոսության համար դուռը բաց է:

«Երկխոսությունն ավարտված չէ: Դռները դեռ բաց են երկխոսության և համաձայնության համար: Մենք պայմանավորվեցինք ևս մեկ հանդիպում անցկացնել: Ինչպես գիտեք, մենք ունենք պայմանավորվածություն, որ չենք բացահայտելու բանակցությունների մանրամասները: Հետևաբար, մենք չենք կարող մանրամասն մեկնաբանել սա, քանի որ մենք պարտավոր ենք պահպանել այս պայմանը: Համաձայնություն ձեռք բերելուն պես հասարակությունն ավելի շատ տեղեկատվություն կունենա: Ընտրություններ են անցկացվել, մենք այժմ քաղաքական երկխոսության մեջ ենք, համաձայնության գալու, թե ինչպես շարունակել համագործակցությունը և ինչպես ապահովել, որ երկրի խորհրդարանը կատարի իր գործառույթը», – հայտարարել է Թալակվաձեն:

Քաղաքական կուսակցությունների ղեկավարների բանակցությունների երկրորդ փուլը տեղի է ունեցել ԱՄՆ-ի դեսպանի նստավայրում: ԱՄՆ դեսպանի հետ հանդիպմանը մասնակցում էր նաև Վրաստանում ԵՄ դեսպան Կառլ Հարցելը: