Վրաստանի նախագահը պաշտոնական այցով գտնվում է Սուրբ աթոռում (Վատիկան):

Նախագահի մամուլի ծառայության փոխանցմամբ, սա Վրաստանի նախագահի պատմական այցն է, քանի որ Վրաստան-Վատիկանի դիվանագիտական ​​հարաբերությունների պատմության մեջ առաջին անգամ փոխհամագործակցության հուշագրեր կստորագրվեն:

Նրանց խոսքով, մինչ այժմ Վատիկանի ու Վրաստանի միջև համագործակցության հուշագիր չի ստորագրվել:

«Պաշտոնական այցի առաջին օրը անցկացված հանդիպումների ընթացքում քննարկվել են հարաբերությունների այն հնարավորությունները, որոնք վրացի ուսանողներին և հետազոտողներին հնարավորություն կտան սովորել Վատիկանի թանգարանի ուսումնական լաբորատորիաներում և անցնել 6-ամսյա պրակտիկա 7 տարբեր տեսակի արհեստանոցներում:

Համագործակցության երկրորդ ուղղությունը կապված է ցուցահանդեսների անցկացման հետ, իսկ երրորդը՝ Վատիկանի թանգարանի ներկայացուցիչների ներգրավումը Վրաստանում շարունակվող վերականգնման և պահպանման աշխատանքներին, որի կարիքն այսօր կա:

Այս հարցերը Վրաստանի նախագահը քննարկեց Վատիկանի թանգարանի տնօրեն Բարբարա Իատայի հետ հանդիպման ժամանակ, որից հետո թանգարանի տնօրենը նախագահին ցույց տվեց թանգարանում վերականգնման կոնկրետ օրինակներ:

Պատմական արխիվի տնօրեն, կարդինալ Լուիս Անտոնիո Տագլեսի հետ հանդիպման ժամանակ Վրաստանի նախագահը խոսեց արխիվի այն հատվածի մասին, որը շատ է հետաքրքրում Վրաստանին և կարևոր է, որ վրացի ուսանողներն ու հետազոտողները հնարավորություն ունենան ուսումնասիրել և համակարգել այս շատ կարևոր պատմական աղբյուրները:

Նախագահը ծանոթացել է Սուրբ Քեթևանի նահատակության և նրա սրբազան մասունքների պատմությանը, ինչպես նաև նրա որդու՝ Թեյմուրազի հավատով լի նամակին և այլ հեղինակների փաստաթղթերին, որոնք արտահայտում են բարեկամական վերաբերմունք Սուրբ Աթոռից ուղարկված առաքյալների նկատմամբ:

Վատիկան կատարած պաշտոնական այցի շրջանակներում Վրաստանի նախագահը հանդիպում կունենա Հռոմի Սրբազան Քահանայապետ Ֆրանցիսկոսի հետ», – ասացին նախագահի մամուլի ծառայությունից: