Դեղագործական ոլորտում թափանցիկություն ապահովելու, բնակչության համար որակյալ և մատչելի դեղամիջոցներ ապահովելու նպատակով, Առողջապահության նախարարությունը բարեփոխումներ է իրականացնում դեղագործության ոլորտում,- այս մասին ասված է Վրաստանի առողջապահության նախարարության կողմից տարածած հաղորդագրության մեջ։

Գերատեսչության տվյալներով՝ բարեփոխման արդյունքում ապրիլի 11-ից բժիշկը պարտավոր կլինի դեղը նշանակել միայն գեներիկ անունով։ Դեղագետը պատվիրատուին կառաջարկի Առողջապահության նախարարության մշակած ջեներիկ դեղերի «դրական ցուցակից» երեք ամենաէժան դեղերը, քաղաքացին ինքը կորոշի, թե որ արտադրողի և ինչ գնով գնել դեղը։

Առողջապահության նախարարությունից հայտնում են, որ նորույթը վերաբերում է 2-րդ խմբի դեղագործական արտադրանքին։

Առողջապահության նախարար Զուրաբ Ազարաշվիլին, խորհրդարանի Առողջապահության հանձնաժողովի նախագահ Դիմիտրի Խունդաձեին, հանձնաժողովի ներկայացուցիչներին և հատուկ ստեղծված աշխատանքային խմբի անդամներին ներկայացրել է դեղագործական ոլորտում թափանցիկության ապահովման համար ստեղծված գործողությունների ծրագիրը։

«Առողջապահական հանձնաժողովը և հրավիրված հյուրերը դրական են գնահատել գործողությունների ծրագիրը և նշել, որ փոփոխությունները դեղագործական շուկան ավելի թափանցիկ կդարձնեն, իսկ որակյալ դեղամիջոցների հասանելիությունը զգալիորեն կբարձրանա։ Գործողությունների ծրագիրը մշակվել է Առողջապահության նախարարության կողմից՝ հիմք ընդունելով Մրցակցային գործակալության առաջարկությունները, Առողջապահության համաշխարհային կազմակերպության կողմից իրականացված ուսումնասիրության արդյունքները՝ տեղական և արտասահմանյան փորձագետների ներգրավմամբ և հաշվի առնելով միջազգային փորձը»,- ասել են առողջապահության նախարարությունից:

Գերատեսչության տվյալներով՝ ապրիլի 11-ից փոփոխություններ կկատարվեն հոգեմետ դեղերի նշանակման կանոններում։ Ձև N2 Դեղատոմսը այլևս չի թողարկվի տպագիր (թղթի վրա) և կտրվի միայն էլեկտրոնային ձևով: