«Մենք ոչ ոքի չենք խնդրում ենթարկվել, օրենքը պահանջում է բոլորին հարգել թափանցիկությունը»,- Վրաստանի Առաջին ալիքին ասել է խորհրդարանի իրավական հարցերի հանձնաժողովի նախագահ Անրի Օխանաշվիլին։

Օխանաշվիլին արձագանքել է ոչ կառավարական կազմակերպությունների համատեղ հայտարարությանը, որտեղ նրանք նշում են. «Մենք չենք ենթարկվի ռուսական օրենքին»։

Օխանաշվիլիի խոսքով՝ այդ մարդիկ չեն ենթարկվում թափանցիկությանը՝ հանուն ժողովրդավարության։

«Անհավատալի է, եթե դուք ասում եք, որ ես աշխատում եմ երկրում ժողովրդավարական սկզբունքների առաջմղման համար, կարևոր է եվրաատլանտյան ձգտումը, բայց դուք չեք ենթարկվում այնպիսի եվրոպական արժեքին, ինչպիսին թափանցիկությունն է։ Հատկապես, երբ իրենք են ասում, որ արդեն թափանցիկ են։ Հետո ինչպե՞ս կարելի է ասել, որ ֆինանսական հայտարարագիր ներկայացնելը խարան է։ Այս մարդիկ հանուն ժողովրդավարության ասում են, որ խնդիրը թափանցիկությունն է, իսկ հանուն ժողովրդավարության՝ դեմ են թափանցիկությանը։ Սա տխուր էջ է այն կազմակերպությունների համար, որոնք ասում են, որ ծառայում են ժողովրդավարական արժեքներին, բայց թափանցիկությունը հայտարարում են որպես դիվերսիա»,- ասել է Անրի Օխանաշվիլին։