Մեզ համար զուգահեռ գործընթացներն ընդունելի չեն,- ասել է «Հանուն Վրաստանի» կուսակցության անդամ Անա Բուչուկուրին։

Աննա Բուչուկուրին ընդդիմադիր գործընկերներին կոչ է արել միանալ իշխող թիմի հետ համատեղ անցկացվող աշխատանքային խմբերին։

«Մենք կիսում ենք եվրոպացի խորհրդարանականների դիրքորոշումը, որ զուգահեռ գործընթացները կոռեկտ չեն։ Կուզենայի, որ բոլորը նստեին մեկ սեղանի շուրջ, բայց առայժմ այս վիճակն ունենք։ Մենք մասնակցում ենք երկու գործընթացներին, մինչև կտեսնենք, որ կարող ենք դրական դեր խաղալ այս գործընթացներում։ «Վրացական երազանքը» վերջնական որոշում է կայացնում 12 հանձնարարականների կատարման վերաբերյալ, և ես կոչ եմ անում ընդդիմադիր գործընկերներին նստել սեղանի շուրջ և միանալ այդ աշխատանքային խմբերին։ «Վրացական երազանքին» գործընթացներում չներառելով՝ չպետք է նրան լրացուցիչ պատրվակ տալ՝ ուրիշին մեղադրելու իր պատասխանատվության մեջ։ Սա է պատճառներից մեկը, որ մենք մասնակցում ենք «Վրացական երազանք»-ի ստեղծած աշխատանքային խմբերին»,- ասաց Աննա Բուչուկուրին։

Տեղեկացնենք, որ «Վրացական երազանքի» աշխատանքային խմբերից անջատված ընդդիմության հատվածն այսօրվանից սկսել է այլընտրանքային գործընթացը։ Արդեն կայացել է ընտրական հարցերով զուգահեռ աշխատանքային խմբի նիստը, որտեղ քննարկվել է սահմանադրական փոփոխությունների և ընտրական օրենսգրքում ապագա փոփոխությունների վերջնական հաստատման հարցը։ Այս պահին ընթանում է ընդդիմության երկրորդ աշխատանքային խմբի հանդիպումը, որտեղ հասարակական կազմակերպությունների ներկայացուցիչների հետ քննարկում են արդարադատության բարեփոխումները։ «Միացյալ ազգային շարժման» պատգամավորները, չնայած իրենց հայտարարած դիրքորոշմանը, այսօր չէին եկել ընդդիմության աշխատանքային խմբերի հանդիպումներին։