Անջեյ Դուդան ելույթ է ունեցել Ռադայում. Ժամանակն է Ուկրաինայի հետ կնքել բարիդրացիության նոր համաձայնագիր
Հաշվի առնելով Վարշավայի և Կիևի միջև բարեկամական հարաբերությունները, հատկապես Ուկրաինայի դեմ Ռուսաստանի լայնածավալ պատերազմի համատեքստում, ժամանակն է ստորագրել Ուկրաինայի և Լեհաստանի միջև բարիդրացիության նոր համաձայնագիրը, – այս մասին ելույթ ունենալով Ուկրաինայի գերագույն Ռադայում, հայտարարել է Լեհաստանի նախագահ Անջեյ Դուդան:
Անջեյ Դուդային Գերագույն ռադայում պատգամավորները դիմավորել են ծափերով։
«Ես խորապես համոզված եմ, որ ժամանակն է ստորագրել բարիդրացիական նոր համաձայնագիր, որը հիմնված կլինի այն ամենի վրա, ինչ մենք կառուցել ենք մեր հարաբերություններում, առնվազն վերջին ամիսներին», – հայտարարել է Լեհաստանի նախագահը:
Նա ասել է, որ ռուսական ագրեսիան ցույց է տվել, որ Ուկրաինայի և Լեհաստանի միջև ճանապարհային, երկաթուղային և ենթակառուցվածքային հաղորդակցությունների ցանցը անբավարար է։ Նա հավելել է, որ դա անհրաժեշտ է փոխհատուցել, և լեհ-ուկրաինական սահմանը պետք է լինի միասնական և ոչ թե մասնատված։
Դուդայի կարծիքով՝ Կիևի և Վարշավայի միջև արագ երկաթուղային կապը պետք է լեհ-ուկրաինական լավ հարաբերությունների նշան լինի։ Մենք այն միասին կկառուցենք»,- ասել է Լեհաստանի առաջնորդը։
Օրենսդիր մարմնում ներկա են նաև Ուկրաինայի նախագահն ու պետական պաշտոնյաներ։
Ըստ ուկրաինական լրատվամիջոցների՝ Վոլոդիմիր Զելենսկին շնորհակալություն է հայտնել Լեհաստանին աջակցության համար և նշել, որ մոտ ապագայում կներկայացվի «Ուկրաինայում Լեհաստանի քաղաքացիների հատուկ իրավական կարգավիճակի մասին» օրինագիծը։
Նաև այսօր կկայանա Անջեյ Դուդայի և Վոլոդիմիր Զելենսկու դեմ առ դեմ հանդիպումը։ Բանակցություններ կանցկացվեն նաև երկու երկրների պատվիրակությունների միջև։ Անջեյ Դուդան վերջին անգամ Ուկրաինա էր այցելել ապրիլի կեսերին, երբ այցելել էր օկուպանտներից ազատագրված Բուչա, Իրպին և Բորոդյանկա։