Անջեյ Դուդան ասում է, որ Լեհաստանը պատրաստ է միջուկային զենք տեղակայել իր տարածքում, եթե ՆԱՏՕ-ն որոշի ուժեղացնել իր արևելյան թևը
Լեհաստանի նախագահի խոսքով՝ Լեհաստանը պատրաստ է միջուկային զենք տեղակայել իր տարածքում, եթե ՆԱՏՕ-ն որոշի ուժեղացնել իր արևելյան թևը։
«Ռուսաստանն ավելի ու ավելի է ռազմականացնում Քյոնիգսբերգի շրջանը։ Ռուսաստանը վերջերս միջուկային զենք է տեղակայել Բելառուսում։ Եթե դաշնակիցները որոշեն միջուկային զենք տեղակայել մեր տարածքում՝ ՆԱՏՕ-ի արևելյան թևի անվտանգությունն ամրապնդելու համար, մենք պատրաստ ենք դրան»,- ասել է Անջեյ Դուդան լեհական լրատվամիջոցներին տված հարցազրույցում։
Դուդայի խոսքով՝ այս հարցը որոշ ժամանակ եղել է Լեհաստանի և ԱՄՆ-ի բանակցությունների առարկա։
«Ես արդեն մի քանի անգամ խոսել եմ այդ մասին։ Պետք է հաստատեմ, որ երբ ինձ հարցրին այդ մասին, ես հաստատեցի մեր պատրաստակամությունը»,- ասում է Դուդան։
Ի պատասխան՝ Կրեմլի խոսնակ Դմիտրի Պեսկովն ասել է, որ «Ռուսաստանը կձեռնարկի անհրաժեշտ պատասխան քայլեր՝ Ռուսաստանի անվտանգությունը երաշխավորելու համար»։
Տեղեկության համար նշենք, որ Լեհաստանի նախագահը նախորդ շաբաթ Նյու Յորքում էր, որտեղ հանդիպել էր Դոնալդ Թրամփի հետ։ Լեհական լրատվամիջոցների հետ զրույցում Դուդան Թրամփին ընկեր է անվանել։
«Ինձ դուր է գալիս զրուցել նրա հետ, քանի որ նա շատ հետաքրքիր անձնավորություն է և մեծ փորձ ունի թե՛ քաղաքականության, թե՛ բիզնեսի ոլորտում»,- ասել է Լեհաստանի նախագահը։