«Վրաստանում մենք չենք տեսնում որևէ նշան իրավիճակի բարելավման՝ ժողովրդավարության, ազատության և այն արժեքների տեսանկյունից, որոնք աջակցում է Եվրամիությունը», – հայտարարել է արտաքին և անվտանգության հարցերով Եվրահանձնաժողովի խոսնակ Անիտա Հիպերը։

Անիտա Հիպերին հարց է տրվել Վրաստանում քաղաքացիական հասարակության և մեդիայի դեմ ուղղված «ռեպրեսիվ օրենքների» վերաբերյալ, որոնք ընդունվել են մի քանի օր առաջ, և որոնց առնչությամբ «Վրացական երազանքի» անդամները հրապարակայնորեն հայտարարել են, որ այդ քայլով ցանկանում են դադարեցնել Եվրամիության աջակցությունը քաղաքացիական հասարակությանն ու մեդիային։

«Ես հոգեբան չեմ, սակայն սա մեղքի բարդման և պրոյեկցիայի դասական տակտիկա է։ Ցավոք, հենց դա է այժմ տեղի ունենում Վրաստանում։ Մենք չենք տեսնում առկա իրավիճակի բարելավման որևէ նշան՝ ժողովրդավարության, ազատության և այն արժեքների տեսանկյունից, որոնք աջակցում է Եվրամիությունը՝ լինի դա քաղաքացիական հասարակությունը, թե խոսքի ազատությունը։ Ինչ վերաբերում է քաղաքական համատեքստին, ինչպես գիտեք, մենք նվազեցրել ենք քաղաքական հարաբերությունների մակարդակը։ Բացի այդ, դադարեցրել ենք Վրաստանի իշխանություններին ուղղված ցանկացած ուղիղ օգնություն և վերացրել ենք դիվանագետների, բարձրաստիճան պաշտոնյաների և նրանց ընտանիքի անդամների համար առանց վիզայի երթևեկությունը։ Մենք միշտ կանգնած ենք լինելու վրացի ժողովրդի կողքին և նաև կքննարկենք Վրաստանի իշխանությունների նկատմամբ հետագա քայլերը՝ ժողովրդավարական ուղի վերադարձնելու նպատակով», – հայտարարել է Անիտա Հիպերը։