Ռուսաստանի փոխարտգործնախարար Անդրեյ Ռուդենկոն հույս ունի, որ համաճարակաբանական իրավիճակը բարելավվելուց հետո Վրաստանի հետ հնարավոր կլինի քննարկել ավիահաղարդակցության վերսկսման հարցը:

Այս մասին նա ասաց ռուսական լրատվամիջոցներին տված հարցազրույցում:

Ռուդենկոն Վրաստանի հետ ավիահաղարդակցության արգելքը անվանեց «հակառուսական սադրանքով պայմանավորված» ժամանակավոր և հարկադրական միջոց:

«2019 թվականին Ռուսաստանի Դաշնության տարածքից Վրաստանի տարածք քաղաքացիների ավիափոխադրումների համար ռուսական ավիաընկերությունների վրա դրված արգելքը հակառուսական հայտնի սադրանքի պատճառով հարկադրանքի միջոց էր: Համոզված ենք, որ այս միջոցը ժամանակավոր է: Հուսով ենք, որ Վրաստանի իշխանությունը դրանից դաս է քաղել, և որ կորոնավիրուսային վարակի տարածման հետ կապված սանիտարահամաճարակաբանական իրավիճակի կայունացումից հետո հնարավորություն կլինի վերադառնալ ավիահաղարդակցության վերականգնման հարցին», – ասաց Անդրեյ Ռուդենկոն: