Անդրեյ Ռուդենկո. Մենք բանակցություններում մեծ առաջխաղացումներ չունեինք, բայց հանդիպումների շարունակությունը կարևոր է, սա միակ տարածքն է, որտեղ կարող ենք հանգիստ խոսել
Մենք բանակցություններում մեծ առաջխաղացումներ չունեինք, բայց հանդիպումների շարունակությունը կարևոր է, սա միակ տարածքն է, որտեղ կարող ենք հանգիստ խոսել, – ասաց Ռուսաստանի փոխարտգործնախարար Անդրեյ Ռուդենկոն՝ Ժնևում:
Ռուդենկոյի խոսքերով, Ժնևի բանակցությունների հաջորդ փուլի հանդիպումն անցել է ինչպես միշտ:
«Հիմնականում մենք ունենք նույն խնդիրները, ուժի չկիրառումը, տարածաշրջանի անվտանգությունը: Կողմերը ներկայացրեցին իրենց դիրքորոշումները, որոնք չեն փոխվել:
Մեծ բեկումներ չենք ունեցել: Այնուամենայնիվ, այս հանդիպումների շարունակությունը կարևոր է, քանի որ դա միակ տարածքն է, որտեղ խոսում ենք նորմալ և հանգիստ: Մենք կոնկրետ արդյունքներ չունենք: Ցավոք, նախորդ տարի համաճարակի պատճառով հանդիպումները դադարեցվել էին, բայց հիմա, կարծում եմ, մենք հետևում ենք թեմային և դինամիկային: Հուսով եմ, հաջորդ հանդիպումը կլինի հունիսին: Մենք քննարկել ենք բոլոր հարցերը, ներառյալ ձերբակալված Գախելաձեի հարցը, դուք այս հարցի շուրջ պետք է խոսեք Հարավային Օսեթիայի հետ:
Մենք խոսեցինք նաև այլ ձերբակալվածների մասին, ներառյալ Աբխազիայում և Հարավային Օսեթիայում: Կա հարցերի մի ամբողջ համալիր, և այդ հարցերի շուրջ դուք պետք է խոսեք Հարավային Օսեթիայի և Աբխազիայի ձեր գործընկերների հետ», – ասաց Ռուդենկոն: