«Հանուն Վրաստանի» կուսակցությունն այս փուլում չի պատրաստվում Ռուսթավիի մեծամասնական պատգամավորի պաշտոնում պաշտպանել Բադրի Ջափարիձեի թեկնածությունը։

Ինչպես Վրաստանի Առաջին ալիքին հայտնել է ընդդիմադիր պատգամավոր Անա Բուչուկուրին, Գիորգի Գախարիայի թիմը Ռուսթավիում սեփական թեկնածու չի առաջադրի։ Նա ասաց, որ այս փուլում կուսակցությունը չի նախատեսում սատարել թեկնածուներից որեւէ մեկին։

«Մինչ ընտրությունները երկար ժամանակ կա, և տեսնենք, թե ինչ կլինի, բայց հիմա մենք ոչ մեկին չենք աջակցում։ Այսպես որոշեցինք՝ ելնելով քաղաքական իրավիճակից։ Այսօրվա դրությամբ մենք չենք պատրաստվում աջակցել Բադրի Ջափարիձեին»,- ասել է Բուչուկուրին։

«Լելոն» Ռուսթավիի միջանկյալ ընտրություններում մեծամասնական ընտրակարգով թեկնածու կառաջադրի Բադրի Ջափարիձեին, ում պատգամավորի մանդատը երեկ կասեցվել էր խորհրդարանում։