ԱՄՆ պետքարտուղարի օգնական Կարեն Դոնֆրիդը հունիսի 17-ին կայցելի Վրաստան
ԱՄՆ պետքարտուղարի Եվրոպայի և Եվրասիայի հարցերով օգնական Կարեն Դոնֆրիդը կայցելի Վրաստան, Ադրբեջան և Հայաստան։ Տեղեկությունը հրապարակվել է Պետդեպարտամենտի կայքում։
Պետքարտուղարության հայտարարության մեջ ասվում է, որ այցը նպատակ ունի ընդգծելու Ամերիկայի հանձնառությունը Հարավային Կովկասի տարածաշրջանում խաղաղությանը, ժողովրդավարությանը և բարգավաճմանը:
Ըստ Պետդեպարտամենտի՝ Կարեն Դոնֆրիդը հունիսի 17-ին կայցելի Վրաստան՝ մասնակցելու նախագահ Սալոմե Զուրաբիշվիլիի կազմակերպած կանանց միջազգային համաժողովին, որտեղ նա կհանդիպի նաև Վրաստանի վարչապետ Իրակլի Ղարիբաշվիլիի և կառավարության այլ պաշտոնյաների հետ։
Ըստ Պետդեպարտամենտի, նախատեսվում է նաև հանդիպում ընդդիմության և քաղաքացիական հասարակության ներկայացուցիչների հետ՝ քննարկելու Ուկրաինայի դեմ Կրեմլի չհրահրված պատերազմը և ԱՄՆ-ի ուժեղ աջակցությունը Վրաստանի ինքնիշխանությանն ու տարածքային ամբողջականությանը միջազգայնորեն ճանաչված սահմաններում: