Մենք ողջունում ենք Վրաստանի զգույշ ջանքերը՝ աջակցելու միջազգային ֆինանսական պատժամիջոցներին և արտահանման վերահսկմանը, որն իրականացվում է ԱՄՆ դեսպանատան աջակցությամբ,- ասված է Միջազգային անվտանգության և զանգվածային ոչնչացման զենքի չտարածման ԱՄՆ Պետդեպարտամենտի բյուրոյի «Twitter»-ի պաշտոնական էջում։

Բյուրոյի ուշադրության կենտրոնում է Ֆինանսների նախարարության եկամուտների ծառայության հետ համագործակցությունը:

Ինչպես հայտնի է, օրերս Վրաստանի ֆինանսների նախարարության եկամուտների ծառայության ներկայացուցիչները և ԱՄՆ դեսպան Քելլի Դեգնանը մասնակցել են Բաթումիի օդանավակայանում անցկացված ռենտգեն սկաների հանձնման արարողությանը, որը նպատակ ունի ուժեղացնել արգելված ապրանքները հայտնաբերելու ունակությունը:

«Այդ փաստը կամրապնդի Վրաստանի ազգային անվտանգությունը, և դա կօգնի մաքսային և սահմանային պաշտպանության մարմիններին կանխել արգելված և զանգվածային ոչնչացման զենքերի ապօրինի շրջանառությունը», – ասված է Միջազգային անվտանգության և զանգվածային ոչնչացման զենքի չտարածման ԱՄՆ Պետդեպարտամենտի բյուրոյի «Twitter»-ի պաշտոնական էջում։

Տեղեկությունը տարածում է Վրաստանի ֆինանսների նախարարության մամուլի ծառայությունը։