ԱՄՆ-ն արգելել է Ռուսաստանի հետ կապ ունեցող նավերի մուտքը իր նավահանգիստները
ԱՄՆ-ի նախագահ Ջո Բայդենը հայտարարել է Ռուսաստանի հետ կապված նավերի համար ԱՄՆ-ի նավահանգիստների փակման մասին։
Ինչպես նշել է Ջո Բայդենը Սպիտակ տանը կայացած ճեպազրույցում, Միացյալ Նահանգները և նրա արևմտյան դաշնակիցները շարունակում են ճնշում գործադրել Ռուսաստանի և նրա միջազգային մեկուսացման վրա։
«Ես այսօր հայտարարում եմ, որ ԱՄՆ-ն արգելում է Ռուսաստանի հետ կապ ունեցող նավերի մուտքը մեր նավահանգիստներ։ Ինչպես արեցին Եվրոպայում։ Ռուսաստանի դրոշով նավարկվող կամ ռուսական ընկերության պատկանող ոչ մի նավ չի մտնի ԱՄՆ-ի նավահանգիստ և ելք չի ունենա դեպի մեր ափ։ Սա ևս մեկ կարևոր քայլ է, որը մենք ձեռնարկում ենք Եվրամիության մեր եվրոպացի գործընկերների, այդ թվում՝ Միացյալ Թագավորության և Կանադայի հետ, որպեսզի թույլ չտանք Ռուսաստանին օգտվել միջազգային տնտեսական համակարգի առավելություններից, որոնք նա վայելել է նախկինում»:
ԱՄՆ-ի նախագահի խոսքով՝ Պուտինը մարտի դաշտում չի հասել իր նպատակներին։
«Մենք չգիտենք, թե դա որքան կտևի, բայց երբ մենք մոտենում ենք պատերազմի մեկնարկից երկու ամսվա նշագծին, սա այն է, ինչ մենք գիտենք։ Պուտինը մարտի դաշտում չի հասել իր մեծ նպատակներին։ Շաբաթներ տևած ռմբակոծություններից հետո Կիևը դեռ կանգնած է։ Նախագահ Զելենսկին և նրա դեմոկրատական ճանապարհով ընտրված կառավարությունը մնում են իշխանության ղեկին, իսկ ուկրաինական զինված ուժերը, որոնց միացել են բազմաթիվ խիզախ ուկրաինացի քաղաքացիներ, խոչընդոտել են Ռուսաստանի կողմից երկրի նվաճումը: Առաջին օրվանից նրանք անշեղորեն ավելացնում են զենքի, տեխնիկայի, զրահատեխնիկայի և հետախուզության իրենց մատակարարումները աշխարհի երկրներ՝ մեր ղեկավարության ներքո», – ասել է ԱՄՆ-ի նախագահը: