ԱՄՆ-ի պետքարտուղարը Վաշինգտոնում հանդիպել է Հայաստանի արտգործնախարարի հետ
ԱՄՆ-ի պետքարտուղար Էնթոնի Բլինկենը Վաշինգտոնում հանդիպել է Հայաստանի արտգործնախարար Արարատ Միրզոյանի հետ։ Ըստ Պետդեպարտամենտի, հանդիպման նպատակը ԱՄՆ-ի և Հայաստանի միջև ռազմավարական երկխոսության մեկնարկն էր։
Պետքարտուղարը պատրաստակամություն է հայտնել ամրապնդել երկկողմ հարաբերությունները՝ ընդհանուր ժողովրդավարական արժեքներին համահունչ և շարունակել համագործակցությունը Հայաստանի բարեփոխումների օրակարգում։
Հանդիպման ընթացքում Էնթոնի Բլինկենը և Արարատ Միրզոյանը ստորագրել են փոխըմբռնման հուշագիր միջուկային էներգետիկայի ոլորտում ռազմավարական համագործակցության վերաբերյալ։
Ըստ Պետդեպարտամենտի՝ Էնթոնի Բլինկենը և Արարատ Միրզոյանը քննարկել են ժողովրդավարական բարեփոխումների, օրենքի գերակայության և կոռուպցիայի դեմ պայքարում Հայաստանի առաջընթացը։ Խոսվել է նաև Հայաստանի և նրա հարևանների միջև ընթացող երկխոսության մասին։
Ըստ Պետքարտուղարության՝ Էնթոնի Բլինկենը շնորհակալություն է հայտնել հայ գործընկերոջը Հայաստանի ցուցաբերած ճկունության համար և կոչ է արել շարունակել ուղիղ բանակցությունները Հայաստանի և Ադրբեջանի միջև։ Էնթոնի Բլինկենը նաև ընդգծել է Միացյալ Նահանգների պատրաստակամությունը՝ որպես ԵԱՀԿ Մինսկի խմբի համանախագահող երկիր, աջակցելու Հայաստանին և Ադրբեջանին՝ հասնելու կայուն խաղաղության և բարգավաճման։