ԱՄՆ նախագահի թեկնածու Դոնալդ Թրամփի նախընտրական արշավի վրա հաքերային հարձակման հետևում կանգնած է Իրանը։ Այս մասին հայտնում է ԱՄՆ հետախուզությունը։

Հետաքննությունների դաշնային բյուրոն և այլ դաշնային գերատեսչություններ համատեղ հայտարարության մեջ նշել են, որ Իրանը միջամտել է ԱՄՆ ընտրություններին` այլախոհություն սերմանելու և ժողովրդավարական ինստիտուտների նկատմամբ վստահությունը խաթարելու նպատակով:

«Հետախուզությունը վստահ է, որ իրանցիներն անմիջականորեն մուտք են գործել երկու քաղաքական կուսակցությունների նախագահական արշավներին սոցիալական ինժեներիայի և այլ ջանքերի միջոցով», – ասվում է հետախուզության հայտարարության մեջ:

Ըստ հետախուզական տվյալների՝ այս գործողություններն ուղղված են ԱՄՆ ընտրական գործընթացի վրա ազդելուն, քանի որ Իրանը, ելնելով իր ազգային անվտանգության շահերից, հատկապես կարևոր է ընկալում 2024 թվականի նախագահական ընտրությունները։

Հետախուզության տվյալներով՝ նմանատիպ հարձակում է իրականացվել ոչ միայն Թրամփի նախընտրական արշավի, այլեւ Քամալա Հարիսի վրա։ Ավելի կոնկրետ, իրանցի հաքերները վիրուսային էլեկտրոնային հաղորդագրություն են ուղարկել։ Ընդհանուր հայտարարության մեջ նշվում է նաև, որ նմանատիպ մարտավարությունը նորություն չէ, և նման մեթոդներ Իրանից և Ռուսաստանից նկատվել են նաև ԱՄՆ նախորդ ընտրություններում։

Հայտնի չէ, թե հաքերները ինչ տեղեկատվություն են կարողացել ստանալ, թեև Թրամփը պնդում է, որ նրանք կարողացել են ստանալ միայն հանրային տեղեկատվություն։ Ավելի վաղ The New York Times-ը, Politico-ն և Washington Post-ը հայտնել էին, որ հաքերներն անանուն փաստաթղթեր են ձեռք բերել Թրամփի քարոզարշավից, ներառյալ JD Vance-ի փաստաթղթերը, թեև նրանք չեն մանրամասնել: