Թբիլիսիի քաղաքային դատարանը կիսել է դատախազության ներկայացրած ապացույցները եւ ամբաստանյալին մեղավոր է ճանաչել Թբիլիսիում երեք մարդու կյանք խլած ճանապարհատրանսպորտային պատահարի մեջ։ Այս մասին տեղեկություն է տարածում Վրաստանի դատախազությունը։

«Դատաքննության ընթացքում հետազոտված ապացույցները ապացուցեցին, որ 2021 թվականի հունիսի 12-ին Թբիլիսիում, Կրծանիսի փողոցի հարևանությամբ, ամբաստանյալը, ով վարում էր թույլատրելիից ավելի զանգվածով բեռնված բեռնատարը, չկարողացավ ապահովել տրանսպորտային միջոցի անվտանգ վարումը, բախվել է մեծ արագությամբ ներքև ընթացող հինգ մեքենաներին եւ ընկել «Նյու Հոսփիթլս» կլինիկայի բակ: Ճանապարհատրանսպորտային պատահարի հետեւանքով երեք մարդ զոհվել է, երկուսը՝ վիրավորվել։

Դատախազությունը հանցագործությունը կատարած անձին մեղադրանք է առաջադրել 276-րդ հոդվածի 2-րդ մասով և 8-րդ մասով (երթևեկության անվտանգության և շահագործման կանոնները խախտելը, որը հանգեցրել է երկու և ավելի մարդու մահվան):

Թբիլիսիի քաղաքային դատարանը մեղադրյալին մեղավոր է ճանաչել առաջադրված մեղադրանքում և դատապարտել ինը տարվա ազատազրկման»,- նշվում է տեղեկատվության մեջ։