Ես չգիտեմ՝ արդյո՞ք Գիորգի Գախարիան կկարողանա ինքնահաստատվել ընդդիմության մեջ, դա հայտնի կդառնա մոտ ժամանակներս, և մենք այդ մասին կիմանանք տեղական ինքնակառավարման մարմինների ընտրություններում, – «Հանուն Վրաստանի» կուսակցության նախագահ Գիորգի Գախարիայի մասին խոսելիս հայտարարել է «Քաղաքացիներ» կուսակցության նախագահ Ալեկո Էլիսաշվիլին:

Ըստ նրա, Գիորգի Գախարիան, խոսելով նեպոտիզմի ու կոռուպցիայի մասին, պետք է հստակեցներ, թե որտեղից են գալիս այդ խնդիրները:

«Ո՞ւմ նախագիծն է, ի՞նչ նախագիծ է, դա ցույց կտան ժամանակը և նրա գործողությունները: Նախկին վարչապետ, բիզնես-օմբուդսմեն, ներքին գործերի նախարար Գիորգի Գախարիան ասաց, որ երկրի հիմնական խնդիրը կոռուպցիան և նեպոտիզմն են: Երեկ, երբ խնդրեցին հստակեցնել, ասաց. «Ես ոչ մի կոնկրետ բան չեմ կարող ասել, ընդհանուր առմամբ, համակարգը»: Կարծում եմ՝ նա այս պատասխանով հայտնվեց էլ ավելի անհարմար դրության մեջ: Քանի որ ինքը պետք է հստակեցներ, թե որտեղից է գալիս նեպոտիզմը, կոռուպցիան, և ովքեր են ներգրավված դրան», – ասաց Ալեկո Էլիսաշվիլին: