Այսօր ունենք այն իրավիճակը, երբ զբոսաշրջային նպատակով երկրում մուտք գործող անձինք մնում են և օգտվում են տարբեր օրենսդրական թերություններից՝ երկարաժամկետ մնալու համար։ Բացի այդ, Եվրոպայի մի շարք երկրներ փոխում և խստացնում են իրենց միգրացիոն օրենսդրությունը և ներդնում մեխանիզմներ ապաստանի համակարգի չարաշահումից պաշտպանվելու նպատակով, – այս մասին հայտարարել է Վրաստանի ՆԳ նախարարի տեղակալ Ալեքսանդրե Դարախվելիձեն Վրաստանի հանրային հեռուստատեսության «Հրատապ թեմա՝ Մակա Ցինցաձեի հետ» հաղորդման շրջանակում։

Նրա խոսքով՝ ներքին գործերի նախարարությունում համապատասխան օրենսդրական նախագծի վրա աշխատանքներ ընթանում են տարիներ շարունակ։

«Մենք հետևում էինք ժամանակակից մոտեցումներին և կոնկրետ միջոցառումներին, որոնք իրականացվում են տարբեր երկրներում, և ինչպես նաև ուսումնասիրում էինք մեր երկրի փորձը։ Այսօր ունենք իրավիճակ, երբ զբոսաշրջային նպատակով մուտք գործող անձինք մնում են և օգտվում օրենսդրական թերություններից՝ երկարաժամկետ մնալու համար։ Եվրոպայի մի շարք երկրներ խստացնում են միգրացիոն քաղաքականությունը և ներդնում համապատասխան մեխանիզմներ՝ ապաստանի համակարգի չարաշահումը կանխելու նպատակով։ Այսպիսով, գոյություն ունի ռիսկ, որ որոշ միգրացիոն հոսքեր կարող են տեղափոխվել Վրաստան։

Բացի այդ, հանրությունը հետևում է աշխարհի տարբեր կետերում տեղի ունեցող ծանր իրադարձություններին՝ պատերազմներին և այլն, որոնք ստիպում են մարդկանց հարկադրաբար լքել իրենց երկրները։ Հետևաբար, բոլոր երկրները ձգտում են խստացնել օրենսդրությունը և ունենալ գործիքներ, որպեսզի այն մարդկանց, որոնք հնարավոր է փորձում են ապաստանի համակարգը օգտագործել երկրում երկարաժամկետ մնալու նպատակով, և որոնց իրականում ապաստան պետք չէ, համապատասխան օրենսդրական մեխանիզմներով սահմանափակեն դա և պաշտպանեն երկրի անվտանգությունն ու շահերը», – հայտարարել է Դարախվելիձեն։