Ըստ «Միացյալ ազգային շարժման» անդամ Ակակի Մինաշվիլիի, եթե «Վրացական երազանքը» չզիջի իրենց պահանջների ու գերակա խնդիրների հարցում, դա կլինի քայլ ընդդեմ Եվրոպայի, և համաձայնություն ձեռք չի բերվի:

«Եթե «Վրացական երազանքի» կողմից մեր պահանջների ու գերակա խնդիրների հարցում փոխզիջում չլինի, ապա դա նշանակում է, որ «Վրացական երազանքը» դեմ է գնացել Եվրոպային, նշանակում է՝ համաձայնություն չի ձեռք բերվի: Մենք շատ կոպիտ հայտարարություններ ենք լսել իշխանությունից, Բրյուսելում վարչապետից, ինչպես նաև Կոբախիձեի և Թալակվաձեի հայտարարությունները: Նրանք ասացին, որ ընտրություններ չեն լինի, և ոչ մի քաղբանտարկյալ չի ազատվի: Այս պարագայում մեր դիրքորոշումն այն է, որ եթե Նիկա Մելիան, որը պետք է լինի բանակցությունների սեղանի շուրջ, Գիորգի Ռուրուան, քաղբանտարկյալները չեն ազատվի, եթե չլինեն արտահերթ ընտրություններ, որոնք այս ճգնաժամի կարգավորման ուղին են, ոչ մի համաձայնություն չի կարող լինել», – ասաց Ակակի Մինաշվիլին ԵՄ գրասենյակում, որտեղ պետք է սկսվի իշխանության և ընդդիմության համատեղ հանդիպումը: