Ադրբեջանում Վրաստանի արտակարգ և լիազոր դեսպան է նշանակվել Գիորգի Զաքարաշվիլին
Ադրբեջանի Հանրապետությունում Վրաստանի արտակարգ և լիազոր դեսպան է նշանակվել Գիորգի Զաքարաշվիլին: Այս մասին տեղեկատվություն է տարածում Վրաստանի արտաքին գործերի գերատեսչությունը:
«Գիորգի Զաքարաշվիլին Արտաքին գործերի նախարարության կենտրոնական ապարատում և դիվանագիտական ներկայացուցչություններում աշխատանքի բազմամյա փորձ ունի:
2021 թվականից մինչ օրս եղել է Ուկրաինայում Վրաստանի արտակարգ և լիազոր դեսպանը և ՎՈՒԱՄ-ում Վրաստանի մշտական ներկայացուցիչը: 2016-2019 թվականներին աշխատել է Ռուսաստանի Դաշնությունում Շվեյցարիայի Համադաշնության դեսպանության Վրաստանի շահերի բաժնի արտակարգ և լիազոր դեսպանորդի պաշտոնում, իսկ 2012-2016 թվականներին եղել է Ուկրաինայում Վրաստանի դեսպանության և ՎՈՒԱՄ-ում Վրաստանի մշտական ներկայացուցչության արտակարգ և լիազոր դեսպանորդը:
Տարբեր ժամանակներում Գիորգի Զաքարաշվիլին զբաղեցրել է նաև Արտաքին գործերի նախարարության քաղաքական դեպարտամենտի տնօրենի և Կենտրոնական Ասիայի երկրների հետ հարաբերությունների վարչության պետի պաշտոնները:
Գիորգի Զաքարաշվիլիին շնորհված է արտակարգ և լիազոր դեսպանի դիվանագիտական աստիճան», – նշված է Վրաստանի արտաքին գործերի նախարարության տեղեկատվության մեջ: